Mîyanê PKKyî de kiriştişê nameyanê şehîdan yew tradîsyon o. Endama PAJKî Zeynepe Kizilirmak zî nameyê hîrê kesanê ke seba tewrbîyayîşê gerîlayan ci rê mamostatîye kerda, kirişena; Jîyane (Zeynepe Erdem), Zîlane (Zeynepe Kinaci) û Zeynepe (Gurbetellî Ersoz).

Zeynepe Kizilirmak derheqê nameyê xo de ANFyî rê qisey kerd. Zeynepe Kizilirmak vat: ''Ez Sêwasî ra ya. Keyeyê mi keyeyêko elewî-kurd o û asîmîle bîyo. Mîyanê keyeyê ma de neqlkerdişê kulturî çin o. Wexto ke yewî pers kerdêne ke ma kurd yan zî tirk ê, keyeyê mi vatêne 'Ma elewî yê.' Herêma ma de mîyanê pêro keyeyan de sirî est bîyî. Ez tim binê tesîrê cinîyan de bîya pîl. Pîrika mi Xanê sindoqê xo de laçikêko sîya, kincê gonînî nimitêne. Wexto ke ez hetê aye ra cîya bîya, ameya şaristan mi xo zaf teyna hîs kerd.

Şaristan de ma taxanê elewîyan de ca bîyî. Uca de kek û wakanê ma yê çepgîran ma rê serkêşîye kerdêne. Ma zî bîyî çepgîr. La tim zerrîya mi de çîyêk kêmî mendêne. Ma şîyêne têkoşîn kerdêne la dima agêrayêne keye. No mi rê ecêb û kêm ameyêne. O çax taxa ma de PKK çin bi. Ez lîse de bîya, yew embaza mi rojêke vat 'Licê ameya vêşnayene.' Mi pers kerd ke Licê kamca de yo. O mi rê hêrs bîyo ke çira ez Licê kamca de ya, nêzanena. Mi xo rê şerm kerd. O çax eleqeyê mi dest pêkerd. Mi rojnameyê Ozgur Gundemî girewtêne. Mudira weşanayîşî Gurbetellî Orsoz bîye. Xanê ra dima Gurbetellî bîya mamostaya min a diyîne.

A serre mi dest pê zanîngehî bikerdêne, embaze Zîlane çalakîya xo kerde. Mi vat 'Yew cinîye senî eşkena ney bikera, no senî yew îrade yo?' Ez çepê Tirkîya ra cîya bîya, ez hînî şîyêne cayê embazan (PKK). Ez tewrê xebatanê ciwanan bîya, ez şîyêne HADEP. Înan vat naja embaze Zîlane Îstanbul de ronişena. Ez şîya keyeyê naje. Aye fotografê Zîlane mojnayêne mi,qala ci kerdêne. Wextê xebatanê ciwanan de embazêko ke gerîlayan ra amebi, mi rê embaze Jîyane pers kerde. Mi ci rê vat ez aye nêşinasnena. Embazî vat 'A zî Sêwasî ra ya, Zeynepe Erdem.' Dima mi eşnawit ke Embaze Jîyane Kampa Ertûşî de şehîd bîya. Dima mi aye ser o cigêrayîşî kerdî.

Wexto ke mi mire daye ke ez tewra gerîlayan bena, mi nameyê Zeynepe weçîna. No mi rê sey yew soz bi. Nê hîrê cinîyan verê ma akerdbi. Ez ge ge xo rê pers kena ke gelo ez layîqê nê nameyî ya. Rayêke mi nê hîrê Zeynepan hewnê xo de dî. Ez kişta layêkî de qîrena. Embaze Zeynepe, embaze Zîlane û embaze Jîyane zî uca de yê. La ê mi nêvînenê, seba ke mi bivînê ez kerrayêke erzena înan. O çax ê mi vînenê û layêk erzenê mi ke ez uca ra bêra. Mi vat înan ez xelisnaya. 

PKK de kiriştişê nameyê şehîdan kulturêk o ke şehîdan keno bêmerg. Ma çeka şehîdan û nameyê înan gênê. No hem mesuldarîyêka girane hem zî rûmetêkê pîlî dano merdimî.  Nameyê pêro gerîlayan yew hîkaye ya. Peyê nê nameyî de yew mîras, tarîx est o. Wayîrê ê nameyan hem mamosta hem zî fermandar ê.''