Kurdanê Moskova serrgêra şehadetî ya hîrê cinîyanê kurdan de merasîmêkê yadkerdişî kerd. Merasîm de ronayoxanê PKKyî ra Sakîne Cansiz, temsîlkara KNKyî ya Parisî Fîdane Dogan û Endama Têgêrayîşê Ciwanan Leyla Şaylemez ê ke 9ê çeleyê 2013î de Paris de ameyî qetilkerdene, ameyî yadkerdene. 

Merasîmê yadkerdişî yê Moskova de Sereka Organîzasyonê Cinîyan ê Moskova Tera Qadir qisey kerd. Qadire îfade kerd ke Sakîne Cansiz ronayoxanê PKKyî ra yew bîye û pêro cuya ci bi têkoşînî derbaz bîye. Qadire vat: "Fîdane Dogan zî xebatanê dîplomasîyan de bîye û zaf xîret kerdêne. Leyla Şaylemez zî xebatê ciwanan ardêne ca."

Qadire bale ante nê çîyî ser ke cinîyanê kurdan têkoşînê azadîye yê şarê kurdan de her tim cepheyanê verênan de şer kerd û ewro zî her parçeyê Kurdîstanî de têkoşînê Sakîne, Fîdane û Leyla dewam keno.