Sekretera Pêroyî ya Partîya Ameyoxê Sûrîye Hevrîne Xelef 12ê teşrîna verêne ya 2019î de wextê îşxalê Serêkanîyê û Girê Sipî de hetê cerganê dewleta tirke ra bi îşkenceyan amebî qetilkerdene. 

Komeleya Heqanê Cinîyan a Seba Averşîyayîşî (AWID) 'Arşîvê Hêvîya Femînîste' de ca da Hevrîne Xelef zî. Arşîv de 88 welatan ra 450 cinîyî ca gênê ke nê cinîyan morê xo dayo tarîxî ro, seba komelî bîyê mîsalêke

Arşîvê AWIDî de sey Hevrîne Xelef xeylêk cinîyê kurdî ca gênê.  AWID giranîye dano ser ke cinîyê ke arşîv de do ca bigêrê, ganî tewrê têkoşînê femînîstî bibê û xoverdayîşê înan seba têkoşînê cinîyan bibo roşnîyêke.  

Sîyasetmedara kurde Hevrîne Xelef seba Rojawanê azadî, têdûştîya cinî û camêrdan û seba azadîya pêro cinî û mezheban têkoşîn kerdêne. 

Qetlbîyayîşê Hevrîne Xelef pêro dinya de bibi rojdem û xeylêk kes, dezgeh û rêxistinanê dinya vera qetilbîyayîşê Hevrîne Xelef nêrazîbîyayîşê xo mojnabi.