Nêrazîbîyayîşê vera betalkerdişê Peymana Îstanbulî dewam kenê. Cinîyî her ca de na bire protesto kenê. Hemşaredara Nîsêbînî û Avûkate Semîre Nergîz derheqê babete de ANFyî rê qisey kerd.

Nergîze ard ziwan ke têkoşînê vera şîdetî neçaretî ya û her çiqas hukmatî Peymana Îstanbulî fesh bikero zî têkoşînê cinîyan do dewam bikero.

Avûkate Semîre Nergîz ard ziwan ke Peymana Îstanbulî peymanêka mîyanneteweyî ya û vat: ''Peymana Îstanbulî xerîteya têkoşînê vera şîdetê serê cinîyan a. Tirkîya peyman îmza kerde û kewte binê mesuldarîyan. Wextêkê dergî ra dima Tirkîya peymane ra xo apey ant. Cinîyan vera betalkerdişê peymane bi xurtî tewirê xo mojna. Peymana Îstanbulî bi taybetî warê têkoşînê vera şîdetî de xerîta ya. Warê pawitişê cinîyan de dewlete wayîrê erkî ya.''

Nergîze vat: ''Cinîyî betalkerdişê Peymana Îstanbulî qebul nêkenê. Na rewşe de ke cinîyî her roje yenê qetilkerdene cinîyî do têkoşînî ra fek vera nêdê. Nika cinîyî ney nîqaş kenê ke senî eşkenê şîdetê ekonomîkî yê vera cinîyan wedarnê. Ganî çita bêro kerdene? Herinda ke dewlete ney bikera dezgeh û sazgehê cinîyan ney kenê. Erko verên rêxistinkerdiş o. Çunke xo rêxistinkerdiş mejbûrî yo. Ma hêvî kenê ke tîya ra netîceyê holî do vejîyê.''