Komxebata Cinîyan ê Kurdan a Ewropa ya vera Îşxalî 5ê êlule de Hollanda de amebî kerdene. Netîcenameyê komxebate ame eşkerakerdene.

Netîcename bi kilmî wina yo:

''Ewropa de messeleya kurdan sey meseleyêka mîyanneteweyî dewam kena. Coka ganî sîyaseto yewbîyaye yê cinîyan ê kurdan ê Ewropa bêro kerdene. Komxebate de ame parekerdene ke dewleta tirke Vakur, Başûr, Rojawan û Rojhelatê Kurdîstanî de îşxalan kena. Rejîmê Tirkîya dişmenê cinîyan û kurdan o.

Rejîmê Tirkîya 3 krîteran pêşkêş keno; tirkbîyayîş, camêrdbîyayîş, sunîbîyayîş. Êyê ke goreyê nê krîteran nîyê hetê Tirkîya ra sey asteng yenê dîyene û werte ra wedarîyenê. Cinîyê kurdî coka maruzê hêrişan benê. Rejîmê Tirkîya pê rayîrê DAÎŞ û Talîbanî wazeno nê hîrê krîteran Rojhelatê Mîyanênî de vila bikero.

La xoverdayîşê kurdan nêverdeno na stratejî Kurdîstan de aver şora ke nê xoverdayîşî de cinîyê kurdî rayber ê. Rejîmê Tirkîya coka Vakurê Kurdîstanî de vera cinîyan sîyasetê sîstematîkî û îdeolojîkî ano ca. Têgêrayîşê cinîyan ê kurdan ê Vakurî asta sîyasetî û asta komelî de xo ver dano. No xoverdayîş cesaret dano pêor cinîyan.

Rejîmê Erdoganî Rojawanê Kurdîstanî de cinîyanê Rojawanî ra qesasê DAÎŞî gêno. Terorê dewleta tirke yê vera cinîyan ê kurdan bi taybetî Efrîn birînêko neteweyî yo. Qirkerdiş, remnayîş, rotiş, tacîz-tecawuzê cerganê Tirkîya cuya cinîyanê Efrînî vurnenê cehenem. Coka wayîrvejîyayîşê cinîyanê Efrînî tewirêko neteweyî yo.

Rejîmê Îranî Rojhelatê Kurdîstanî de cinîyan ê kurdan rê şerê taybetî, hişmendîya pederşahî ferz keno. Başûrê Kurdîstanî de dewleta tirke îşxal û vilakerdişê hişmendîya xo rê dewam kena. Sîyasetê Başûrî cara cinîyan teberê biran de verdeno. Komxebata ma bi taybetî venga PDKyî dana ke qirkerdişê gerîlayan vindarno û aqîbetê gerîlayan ê vînîbîyayeyan eşkera bikero. Ma hukmatê herêma Kurdîstanî ra zî wazenê ke wa verê qirkerdişê sîyasetmedaranê Rojhelatê Kurdîstanî bigêro.

Komxebata ma ya ke cinîyanê 4 parçeyanê Kurdîstanî ra yena meydan veng dana ke wa azadîya Rayberê KCKyî Birêz Abdullah Ocalanî bêra caardene. Komxebata ma qirkerdişê 7 gerîlayan ê pê destê PDKyî sey tehlukeyêkê pîlî û amadekarîya şerê zereyî ya PDKyî vînena.  

Komxebata ma de de yewîya neteweyî babeta verêne ya nîqaşan bîye. Pê nîqaşan komxebata ma bi hawayêkê serkewteyî qedîyaye. Komxebate de nê birî ameyî girewtene:

-Awankerdişê Înîsîyatîfê Cinîyan ê Kurdan ê vera îşxalî hewcedarîyêka lezabez a.

-Komxebate venga PDKyî dana ke qirkerdişê gerîlayan vindarno, aqîbetê gerîlayan ê vînîbîyayeyan eşkera bikero û Tirkîya rê rayîrê îşxalî amekero.

-Ganî bi lezî heyetêk vera îşxalî şoro Başûrê Kurdîstanî.

-Ganî mîyanê rêxistinanê cinîyan de çarçewa yewîya neteweyî de beşê hunermendan, akademîsyenan, sîyasetmedaran, dadîyanê şehîdan estbê.

-Ganî cinîyî derheqê yewîya neteweyî de sîyaset de israr bikerê

-Ganî semedê karan ê dîplomatîkan ê vera îşxalî û semedê yewîya neteweyî heyetê cinîyan bêrê awankerdene.

-Temsîlkaranê hukmatê Iraqî û rêxistinanê mîyanneteweyîyan rê vera îşxalê Tirkîya do mektubî bêrê erşawitene.

-Cinîyanê partîyanê Başûrî rê û rêxistinanê cinîyan rê mektubî do bêrê erşawitene ke vera îşxalî vengê xo berz bikerê.

-Konferanso 3. yê Yewîya Neteweyî yê Cinîyan wa cade bêro kerdene û verê îşxalî bêro girewtene.

-Komxebate venga pêro partî û rêxistinanê kurdan dana ke cinîyan sey îradeyê xoserî bişinasê û îmkan bidê ke cinîyî nîqaşanê yewîya neteweyî de ca bigêrê.

-Komxebate venga hukmatê herêma Kurdîstanî dana ke cade rojnameger û çalakîkeran ê tepişteyan ê Behdînanî vera bido.

-Komxebate venga hukmatê herêma Kurdîstanî dana ke verê qirkerdişê sîyasetmedaranê Rojhelatê Kurdîstanî bigêro.

-Komxebate venga pêro kurdan dana ke sey erkêkê neteweyî xîret bikerê ke cinîyê kurdî yê êzidîyî yê vînîbîyayeyî wa bêrê azadkerdene.''