Endama Fermandarîya Pêroyî ya YPJyî Newroze Ehmed bi wesîleya serrgêra 10. ya Şorişê 19ê Temmuze ANFyî rê qisey kerd.

Newroze Ehmed derheqê destkewte û vurîyayîşanê ke netîceyanê Şorişê 19ê Temmuze de dinya de qewimîyayê de vat: ''Şorişê 19ê Temmuze wextêkê winasênî de ke sîstemê krîzê globalî ciwîyayêne de qewimîya, xora nê şorişî do tesîrê pêro dinya bikerdêne. Prosesê Wisarê Ereban o çax serewedaritişê şaran bi. Nê prosesî 2010-2011 de dest pêkerd û pêl bi pêl vila bi. O çax krîzê pîlî est bîyî. Ma destpêk de no proses sey şerê dinya yê hîrêyînî pênase kerd. Nê prosesî têna erebî nê kurdî zî girewtî binê tesîrê xo. O çax serewedaritişan bi çend kesan dest pêkerd û wextêkê kilmî de nê serewedaritişî resayî bi mîlyonan kesan.

Têna Şorişê 19ê Temmuze de nê serewedaritişanê Wisarê Ereban de zî cinîyan ca girewt. Rojawan de cinîyê kurdî vera îqtîdarî wayîrê mîrasêkê xurtî bîyî. Coka cinîyan Şorişê 19ê Temmuze de rolêko pîl kay kerd. Cinîyê kurdî bi fedakarîyêka pîle, rixmê zehmetîyan zî tewrê prosesê şorişî bîyî. O çax sîstemî vurîyayîşî wina rehet qebul nêkerdêne. Coka komelî hewceyê pawitişî bîyî. Bi nê armancî Yewinê Pawitişî ronîyayî. Cinîyan zî mîyanê nê yewinan de ca girewt û serkêşîye krde. Prosesanê verênan de şerê vera cergan de ma tecrubeyê pîlî vistî destî. Bi şerê ma yê vera DAÎŞî dinya ma şinasnayî. Bi şerê ma yê vera DAÎŞî ma bîyî hêzêko global. Şexsê embaze Lêgerîne û Avaşînan de zî xeylêk kesan verê xo da şorişî û ney kerd ke Şorişê 19ê Temmuze sînoran derbaz bikero. YPJ bi nê hawayî bi sembolê têkoşînê azadî û yewîye.

Vera cinîyan kerdişê sîstemê serdestîya camêrdan heman cayan de wayîrê heman metodan ê. Coka cinîyî ganî xo aver berê û xo rêxistin bikerê. Cinîyan xeylêk şorişan de ca girewt la têkoşînê înan gama diyîne de mend û sey meseleya ke dima do bêra çareserkerdene, ameye dîyene. A raşte meseleyê esasî meseleyê cinîyan ê. Têkoşînê ma nê warî de gamêka pîle bi. Bi taybetî waro leşkerî warêko zaf zehmet o la ma warê leşkerî ra dest pêkerd û nika zî cinîyî pêro waranê Îdareyê Xoserî de ca gênê. Serkêşê ma Jînda, Ruksen, Warşîn, Ozgur û Zozane bîyî sembolê xoverdayîş û şorişî. Tewr peynî Xoverdayîşê Rûmetî de Hevrîne Xelef û Yadê Eqîdê bîyî sembolê xoverdayîşê cinîyan. Şorişê 19ê Temmuze mojna ke eke merdim biwazo têkoşîn bikero sînorî çîn ê. Nê 10 serran de cinîyan bedelê giranî dayî la bîyî hêvîya serkewtişî. Ewro ma her roje benê hedef la nê hêrişan reyde ma tecrubeyêko zaf pîl zî vist destî. Ma do vera tehlukeyanê serê şorişî xo bihêz bikerê, estbîyayîş û hişmendîya xo bipawê. Sey Afganîstanî xeylêk cayanê dinya de seba ke cinîyî bi sereyê xo, pawitişê xo nêkenê bêpawitiş manenê. Ma sey cinîyan eşkenê birînanê xo pîya derman bikerê.

Ma sey YPJyî do tim Şorişê Rojawanî bipawê. Dişmen her çiqas sey barbarêkî ma ser de bibo zî ma her hetî ra amadeyê hêrişanê ci yê. Ma pê hêvîdar ê ke şarê xo reyde erdê xo de, bi hawayêkê azadî biciwîyê.''