Weşanxaneyê Hohenemsî yê Awusturya, serra 2009’î ra nata Xelata Edebîyatî ya Hohenemsî dano nûştoxanê ke ziwanê maya înan Almankî nêyo labelê bi Almankî nûsenê.

 Tena Awusturya de nê Almanya û Swîsre ra zî nûştoxê ke bi Almankî nûsenê tewrê musabeqeye benê. Seba girewtişê xelate 111 nûştoxanê koçberan muracat kerd. Jurîya xelate zî nûştoxa Kurde Karoş Taha layîqê xelate dîye.

 Komîteya jurî vat ke Tahaya ke bajarê Zaxoyî yê Başûrê Kurdistanî ra ya, gama ke 9 serrî bîya pîya bi keyeyê xo mecbûr menda koçê Almanya bikero. Seba qelema aye ya zafkulturî û zafziwanî înan a layîqê na xelate dîya.

 Taha dimayo ke xelate girewte medyaya Awusturya de qisey kerd û vat seba ke zereyê keyeyî de ziwan hem Kurdkî û hem zî Almankî yo berhemê aye rengên ê. Taha vat, “Serran ra dima ma agêrayî Kurdistan. Maya mi nêzanayêne bi kamcîn ziwanî mi dir qisey bikero. Seba ke a bimûso waştêne ke Almankî qisey bikero, seba ke ez Kurdkî xovîr ra nêkerî mi zî waştêne ke Kurdkî qisey bikerî.”

Taha ard ziwan ke hewnê aye zî hendî bi Almankî û Kurdkî yê û vat a seba girewtişê Xelata Hohenemsî zaf kêfweş a. Taha xelata xo bi merasîmêk girewte.

 Romanê “Beschreibung einer Krabbenwanderung“ (Qalkerdişê Rayraşîyayîşê Kerkencikêk) ya Karoş Taha serra 2018 de ame weşanayene. Romanê aye eyaletê NRW’yî yê Almanya de zî xelate girewtebî.