Koordînasyonê PAJKî bi eşkerayîyêke Komployo Mîyanneteweyî yê 9ê Teşrîna Verêne yê vera Rayberê Şarê Kurdî Abdullah Ocalanî şermezar kerd.

''Ma hê dekewenê serra 25. ya Komployê Mîyanneteweyî. Sere de Amerîka, Îsraîl û Tirkîya ma hêzanê komplogeran reyna şermezar kenê. Ma şexsê şehîdanê 'Şima nêeşkenê tîja ma tarî bikerê' û şehîdanê çalakîya Mersînî Sara Goyî û Zelale Rûken de pêro şehîdanê xo bi rêz û minetî yad kenê. Ganî bizanîyo ke hêzê serdestî planê komployî de bin kewtî û nêeşkayî biresê armancanê xo. Komplo xêrê tewirê azadîye yê Rayber Apoyî û cinîyan û têkoşînê rayaumûmîye ame pûçkerdene. Ewro paradîgmaya Rayber Apoyî pêro dinya rê vila bîya.

Komployî sîstemê Îmraliyî de dewam kerd, 2014 ra nata zî ame xorinkerdene. Hêzê komplogerî 19 mengî yoo heqê Rayber Apoyî binpay kenê, nêverdenê o avûkatanê xo û keyeyê xo bivîno û nêverdenê Îmrali ra xeberêke şora teberî. Planê komployî planêko mîyanneteweyî û tehlukeyî bi. Ewro mesuldarê nê komployî welatê Ewropa û dezgehê sey CPTyî hetê dewleta tirke de cagênê. Dewleta tirke ya faşîste ney ra paştî gêna û bi hawayêkê bêperwayî huqûqî binpay kena.

CPTyî heta nika bê tedaya şar û dostanê ma xîretêk nêkerd û eşkerakerdişê raporanê xo zî tim apey eşt. 'Heqê hêvî' yê Rayberê ma zî ame waştene ke nêro caardene. CPTyî na êlule de Îmrali zîyaret kerdo la nêwazeno raporê xo eşkera bikero. No zî mojneno ke CPT tay raştîyan ra remeno. Vera Rayber Apoyî îmhayêka bêvenge yena kerdene. Raporo ke tedeyîya ci nêzanîyena ma rê çîyêkî îfade nêkeno. Azadî, weşî û asayîşê Rayber Apoyî ma rê babetê kilîdî yê. Coka merkezê têkoşînê ma de azadîya Rayber Apoyî est a. Komplo resayo a aste ke vera şarê ma, têgêrayîşê ma yê azadîye û têgêrayîşê ma yê cinîyan hêrişanê barbaran keno.

Astengkerdişê komployî astengkerdişê faşîzm, dîktatorîye, seksîzm, nîjadperestîye, îşxal û kolonyalîzmî yo. Qederê Rojhelatê Mîyanênî pabesteyê ney o. Heta ke sîstemê Îmraliyî nêro şiknayene demokrasî û azadîye do nêrê. Rayîrê demokrasî û azadîya raştikêne Îmrali ra derbaz beno. Naye ra ber kurdî do sîyasetêkê bînî cidî nêgêrê.

Rayber Apoyî pê felsefeya 'jin, jiyan, azadî' têkoşînê azadîya cinîyan resna manaya raştêine û xeta têkoşînî. Coka azadîya Rayber Apoyî azadîya pêro cinîyan a. Ma venga cinîyan danê ke bi şîarê 'jin, jiyan, azadî' komployî parçe bikerê, vera sîstemê serdestîya camêrdan şorişê cinîyan berz bikerê. Her cinîya kurde ganî sey fedayîya Rayber Apoyî têbigêra.

Rayber Apoyî pê paradîgmaya azadîya cinîyan û konfederalîzmê cinîyan hêvîye kerde pîle. Erkê pêro merdimîye yo ke hêzanê komplogeran, îqtîdaranê netewe-dewlete, xeta îxanetî ya PDKyî bin bikerê. Nê esasî ser o ma venga pêro kesan danê ke tewrê Hemleya Wextê Azadîye ya KCKyî û tewrê Hemleya 'Wextê Pawitişê Cinîyan û Komelê Azadî' bibê û serra 25. de komployî bikerê binê erdî.

Komplogerî do bêrê binkerdene, cinî, şarê ma, azadî û demokrasî do ser bikewê.''