Koordînasyonê PAJKî bi eşkerayîyêke pare kerd ke Endama Meclîsê PAJKî Bêrîvane Zîlan şehîd bîya.

Eşkerayîye wina ya:

''Embazê ma yê fedayî têkoşînê azadîye yê şarê ma de tewr vernî de şinê, vera hêrişanê dişmenê faşîstî heta peynî xo ver danê û bi şerê xo verê serfîrazîye roşnî kenê. Embaza ma Endama Meclîsê PAJKî Bêrîtane Zîlana ke alaya nê têkoşînî berd kerdêne, 17ê hezîrane de Herêmanê Pawitişî yê Medya de hêrişê hewayî yê dewleta tirke ya faşîste de şehîd bîye. Ma şexsê embaze Bêrîtane de pêro şehîdanê şorişî bi rêzdarî û minetî yad kenê. Ma keyeyê ercîyayayeyî yê Hezerî rê, şarê ma û hemrayanê ma rê serweşîye wazenê.

Ma do sey PAJKî dewleta faşîste-qirkere û hemkaranê ci ra qetî hesabê nê şehadetî pers bikerê, qesasê ney bi giranî bigêrê. Tarîx do tim şahîdîya şerwananê cuya rûmetênî û xoverdayîşî bikero. Şorişgêrê pîlî do tim bibê îrade, vîr, hişmendî û wijdanê ma.

Embaze Bêrîvane Zîlan bîye wayîra tewrbîyayîşêkê milîtanî ke her hela têkoşînî ciwîyaye, vera zehmetîyan xo ver da, artêşbîyayîş û gerîlabîyayîşê cinîyan de rolê pîlî ardî ca. Aye pêro erkê xo bi serkewtişî ardî ca û seba ney zî kedêka bêhempa daye. Aye bi perwerîya Rayber Apoyî tim verê xo da waranê tewr çetinan ê têkoşînî. A vera hişmendîya serdestîya camêrdan bîye hişmendîya azade ya cinîyan. A mîyanê xeta partîye de bîye fermandare û têkoşînê komelkî de zî bîye serkêş.

Embaze Bêrîvane 1976 de Erdîşê Wanî de dadîya xo ra bena. A domanîya xo de pê hîkayeyanê Gelîya Zîlane bena pîl û sey domananê bînan ê kurdan rew bena pîl. Perwerîya ci ya bi erd, şar û tarîxî û hêrsê ci yê vera dişmenî a kerde cehdê têkoşînî. A bi nê hîsan serra 1991î de verê xo dana koyan û tewra têkoşînê azadîye bena.

A hema destpêk de pê tewrbîyayîşê xo yê serkêşî bala embazanê xo ancena û Warê Rayberîye de pê perwerdeyan hişmendî, îrade û kesayetê xo kena zixmêr. A zerrî ra pê felsefeya azadîya cinîyan a Rayber Apoyî bawer kena û oxirê ney de bi eşqî têkoşîn kena. A pêro waran de şer kena, serkêşîye kena. a Serhedî ra heta Zagrosan, çar parçeyanê Kurdîstanî ra heta Armenîstanî xeylêk waran de xeta partîye de têkoşînî kena û nê pêro waran de sey milîtanêka cinîye serkêşîye kena. A tim verê xo dana serkewtişî, koyan de bena fermandarêka zixme, mîyanê şarî de bena temsîlkara îdeolojîya azadîye û serkêşe.

A artêşbîyayîşê cinîyan, averşîyayîşê xeta azadîya cinîyan û têkoşînê vera serdestîya camêrdan û hişmendîya kanwazî de rolanê pîlan ana ca. A pê îrade û cesaretê xo, pê kesayetê xo yê jîhatî, serewedarnayox û azadî bena milîtanêka raştikêne. A bedelê ci çi beno wa bibo tim erjanê partîye pawena. A seba perwerdeyanê PAJKî serranê xo dana û mîyanê PAJKî de erkanê girîngan ana ca.

Embaze Bêrîtane nê 31 serranê têkoşînê xo de pê înad, cehdkerdişî têkoşîn kena. A seba ke qesasê Gelîya Zîlane, Agirî, Dêrsim, Koçgirî, Şingal, Roboskî û Efrînî bêro girewtene xeta Zîlane de şer kena.

Dewleta tirke ya faşîste-qirkere pê destekê NATOyî û hemkaran seba ke şarê kurdî, têgêrayîşê azadîye û têgêrayîşê cinîyan ê kurdan tasfîye bikera çeka kîmyewîye zî tede pêro metodanê barbaran ana ca, cinîyan ê kurdan ê serkêşan qestî ra kena hedef û kurdan rê qirkerdiş ferz kena.

Ewro Zap, Zagrosan, Metîna û Vakurê Kurdîstanî de pê şerêkê bêhempayî û bedelanê pîlan hesabê qirkerdişanê dewlete yeno perskerdene û rejîmo faşîst yeno dekerdene binê erdî. Wa bizanîyo ke serkêşîya cinîyan de do xeta îxanetî ya PDKyî bêra parçekerdene, îqtîdarê rejîmê Erdoganî hesabê sûcanê xo bido û rejîmo faşîst ê tirkan do binkewtişê tarîxîyî tame bikero. Têkoşînê ma yo destanwarî do pê serfîrazîya cinîyan û şarê ma tacîdar bibo.

Ma do qetî embaze Bêrîvane û şehîdanê xoverdayîşê bêhempayî xo vîr a nêkerê. Ê do tim mîyanê têkoşînê ma de biciwîyê. Ê erjê merdimîye û tarîxî yê. Ê vengdayîşê şerê vera îxanet û qirkerdişî yê. Ê sondê Rayber Apoyî yê. Ma do rêçê şehîdanê xo yê ezîzan de, wayîrê erjan û xeta fedayîtîye vejîyê, têkoşînê xo pîlêr bikerê û dewleta faşîste û hemkaranê ci ra hesab bipersê. Serfîrazîye û azadîye do bibê ê şarê ma û cinîyan.''