Koordînasyonê Partîya Azadîye ya Cinîyan a Kurdîstanî (PAJK) bi wesîleya serrgêra 23. ya şehadetê Sema Yuce eşkerayîyêke weşanaye.

Eşkerayîye wina ya:

''Ma bi wesîleya serrgêra 23. ya şehadetê embaze Sema Yuce (Serhildane), şexsê embaze Sema, Gulane, Zîlane de pêro şehîdanê têkoşînê azadîye pê rêz û minetî yad kenê, soz û bira ke ma daya şehîdan reyna dibare kenê.

Embaze Sema Yuce 1971 de Agirî de dadîya xo ra bîye. A mîyanê komelêkê kurdperwerî de bena pîl ke nê komelî kesayetê Sema de bezreyê xo ramitî. Raştîya cinîya xoverdayoxe ya Kurdîstanî tim bîye raybera têkoşînê rûmetî. Embaze Sema pê raştîya nê kesayetî têgêrayîşê azadîye şinasnea û 1991 de tewra ci bena. Tarîxê têkoşînî de her netewe û komelê xoverdayoxî de kesayetanê rayberan morê xo da binê dewranê neweyan. Na raştîye tarîxîye rayberîya fikr û felsefeya Rayber Apoyî de pê afernayîşê cinîya azade cuyêka newîye viste vernî. Embaze Sema Yuce kesayetê xo esasê felsefeya Rayberîye awan kerd. Embaze Sema têkoşînê vera hişmendîya camêrdan û pederşahîye kesayetê xo de kerd. Na raştîya têkoşînî ewro pêro parçeyanê Kurdîstanî dewam kena.

Serrgêra 23. ya şehadetê embaze Sema de ma sey têgêrayîşê azadîye yê Kurdîstanî hêrişanê qirkeran ê tasfîye reyde têrî yê. Vera Rayberîya ma tecrîdo giran dewam keno. Hêzê komplogerî senî ke 1998 de pê Komployê Mîyanneteweyî xîret kerd ke têgêrayîşê ma tasfîye bikerê ewro zî pê hêrişanê xo nê planî rê dewam kenê. Embaze Sema Komployê vera Rayberîye, cinîya azade û şarê Kurdîstanî ferq kerd û bedenê xo da adirî ver. Aye vera faşîzmê dewleta tirke xeta Sara, Kemal û Mazlûman de nasnameyê cinîya azade temsîl kerd û xo ver da. Embaze Sema û bi seyan embazanê ci dormeyê Rayberîye de çemberê adirî awan kerd û pê şîarê 'Şima nêeşkenê tîja ma tarî bikerê' hîşmendîya komplogere çin kerde. Rayber Apo 22 serrî yo bi hawayêkê bêhempayî Îmrali de xo ver dano. Rayberîya ma, raştîya şehîdan hertim cewab da dişmenî û raştîya têkoşînê şehîdan kerde pîlêr. Ma sey PAJKî ewro zî na raştîye ser o têkoşîn kenê. Senî ke embaze Sema vat 'Senî hasmên de di tîjî nêbenê seba cinîye zî di çimeyê moralî nêbenê' a kokê kesayetê xo yê azadî de bîye çimeyê roşnîye.

Ma ewro zî nê esasî ser o vera dewleta tirke ya îşxalkere  û hêzanê komplogeran pê stratejîya şerê şorişgêrî yê şarî şerêkê çetin û têkoşînêkê pîlî kenê. Her gerîlaya YJA-Starî xeta fedayîye ya Sema, Gulane û Zîlanan de tarîxî newe ra nusenê. Teqîbkerdoxê Sema Yuce pêro Kurdîstan û zîndananê Tirkîya de oxirê azadîye de xo ver danê. Embaze Sema soz dabi ke azadîya Rayber Apoyî bîyara ca. Ewro na qerardarî hetê gerîlayanê YJA-Starî ra koyanê Zagros, Zap, Metîna û pêro koyanê Kurdîstanî de xo mojnena ra.  Ma pê ruhê Sema têkoşîn bikerê, pê mtodê çalakîya Zîlane şer bikerê û pê perwerîya embaze Gulane beşdarê şerî bibê. Ma do raştîya cuya azade Kurdîstan, Rojhelatê Mîyanênî û dinya de rayberîya cinîya azade bikerê.

Nê esasî ser o ma reyna embaze Sema Yuce, pêro şehîdanê hezîrane, şehîdanê Bazanê Zagrosî û Cengê Xabûrî pê rêzdarî û minetî yad kenê û sozê xo dibare kenê. Ma vanê vera nê hêrişan û planê tasfîyekerdişî, xeta şehîdanê ma, têkoşînê cinîyan do ser bikewê, îşxalker û xayînî do Kurdîstanî de çin bibê.''