Koordînasyonê PAJKî keyepelê xo de bi mesajêkê nuştekî Newroza 2022î fîraz kerde

Mesajê PAJKî wina yo:

''Ma Roşanê Newroza 2022î ya cinîyan û şarê xo fîraz kenê ke bi coşê wisarî şorişî ciwîyenê, bi deyîran pêro waran 8ê Adare ra heta Newroze dekenê. Ma pê bawer kenê ke xo xoverdayîş do bi Newroze pîl bibo, vurîyo serewedaritiş û cuya azade biresno safhayêka girînge. Newroze serewedaritiş o. Newroze bi pîlkerdişê fikrê vervejîyayîşê kolonyalîzmî, xoverdayîşêkê şarî vejena werte. Newroze na mana de roşanê cinîyan o. Newroze têgêrayîşêko şorişgêr o. Fîrazkerdişê Newroze fîrazkerdişê serfîrazîya şorişî yo.

Roşanê Newroze bi destpêkerdişê xoverdayîşê PKKyî û têgêrayîşê azadîye resa na mana. Bingeyê PKKyî Newroze de ronîyayî. Rayber Apoyî bi tesbîtê 'Kurdîstan kolonyal o' Newroza 1973î de vera kolonyalîzmî xoverdayîş da destpêkerdene. Ewro cinîyê ke serkêşîya komelî kenê û mîyanê PAJKî de ver bi azadîye şinê bîyayîşê Rayberîye û Newroza Rayberîye yê. Têkoşînê Embaze Sara sey serewedaritişê azadîya cinîya Newroze mana dîye. Embaze Sara na mana mîyanê serran de xorin kerde û cewherê ci de resnaye raştîya artêşbîyayîş, azadî û rindbîyayîşê cinîyan.

Ewro ma Newroza 2022î reyde rûmetê Newroza Rayberîye ya 50. ciwîyenê. Şarê ma destpêkê adare ra heta Newroze  bi qerardarîya pîle, bi xoverdayîş û eşqî naye pêşwazî keno. Cinîyê kudî do çalakîyanê 8ê Adare bi Newroze tacîdar bikerê. Nika ra ma Newroza pêro parçeyanê Kurdîstanî fîraz kenê. Ma pê bawer ê ke no coşê Newroze heta peynîya adare dewam bikero, çalakîyan pîl bikero, îqtîdaran do bin bikero û serra 2022î bingeyê azadîye de newe ra awan bikero.

Ma bi wesîleya Newroza 2022î Kawayê Hemdemî embaz Mazlûm Doganî bi rêzdarî û minetî yad kenê. Ma dîyar kenê ke heta komelê azadî biafernê, ma do wayîrê mîrasê embaz Mazlûmî vejîyê.

Tarîxê Kurdîstanî de bedelê rindbîyayîşî pîl o. Cinîyan ê kurdan bedenê xo da adirî ver, wina Newroze fîraz kerde û manayêka tarîxîye daye Newroze. Bîyayîşo newe bircanê Kelaya Amedî de Zekîye Alkan de, bedenê Rehşane Demîrel de, qerardarîya azadîye û embazîya Bêrîvane û Ronahîyan de têkoşînê ma yo. No tarîx sey PAJKî pêro helanê ma roşnî keno. Ma sey PAJKî reyna çalakîyanê nê cinîyan selam kenê. Nê çalakîyî tarîxê ma yê, ameyoxê ma yê û ewroyê ma yê. Ma qerardar ê ke wayîrê ameyox û wextê nikayênî yê ma yê bi Rayberîye û komelbîyayîşî vejîyê.

Newroza 2022î do biba destpêkê pêvînayîşê bi Rayberîye û cinîyî heta peynîya serre çalakîyanê xurtan reyde çalakîyanê Newroze derbaz bikerê û do serkêşîya komelî bikerê. Na qerardarîya çalakîyan do cinîyan bikerê azad. Ma bawerîya xo ya azadîye Newroza 2022î de bikerê yew. Ma pê bawer ê ke şarê Kurdîstanî Newroza 2022î de do bikewo serra newîye ya azadîye. Ma sere de cinîyan venga pêro şarê xo danê ke coşê Newroze pîl bikerê, waran bi ruhê serewedaritişî debikerê û saltanatê Dehaqanê nê çaxî birijnê.''