Koordînasyonê Partiya Azadiya Jin a Kurdistanê (PAJK) eşkerayîya nuştekîye daye û nê pare kerdî:

''Têkoşînê kurdan ê vera dewleta tirke û semedê azadkerdişê Kurdîstanî resayo bertengê serkewtişî. Wexto winayên de PDK hemkarîya dişmenê kurdan keno. Na eşkera xayînîye ya. PDK pê bahaneyanê cîya cîyayan hêzanê pêşmergeyan û gerîlayan wazeno biverdo pê ke no pê adirî kaykerdiş o. Dewleta tirke ya ke vera xoverdayîşê gerîlayan têngayîye de ya wazena pê destê PDKyî xo bixelisno. PDK ganî cadê nê rolê xo yê bêbextî caverdo.  Seranserê koyanê Kurdîstanî de xoverdayîşê gerîlaynê HPG û YJA Starî esto. Zap, Metîna, Avaşîn û Heftanîn de xoverdayîşo destankî yeno kerdene.  Ganî sere de partîyê sîyasîyî kurdî wayîrê nê xoverdayîşî vejîyê.

Dewlet tirke vera kurdan zilmo ke nêkerd nêmend. Vera dişmenî ganî  ma bibê yew û pêro pîya têkoşîn bikerê. No wezîfeyê heme kurdan o.  Şar eşkeno verê nê kerdişanê tehlukeyinan ê PDKyî bigêro. Tîya wezîfeyo verên ê cinîyan ê kurdan o. Ma dayîkanê laçiksipîyan, cinîyan ê ke Başûrê Kurdîstanî ra  heta Rojawanî, Vakur û Ewropa de vengê xo berz kenê, selam kenê. Cinîyan ê ke semedê azadîye kerdo xo çeng pê pîlkerdişê têkoşînî vera îşxalkeran û zîhnîyetê camerdê serdestî tim cewab danê.

Xeta sûr a kurdan welat, anor, nasname  û azadîyê înan ê. Erjê azadîya cinîyan û erjê Kurdîstanî erjê globalî yê dinya yê.  Cinîyê kurdan do heme kayanê leyminan ê ke kurdan anê vera yewbînan do bixeripnê û verê sîyasetê gonî , rantê şerî û îqtîdaranê despotan do bîgêrê. Wext wextê pîlkerdişê têkoşînî yo. Her cayê Kurdîstanî û teberê welatî de ganî vera îşxalî têkoşîn bêro pîlkerdene. Cinî û ciwanî eşkenê verê şerê zereyî bigêrê. Semedê nayî ganî heme şexsîyetî û temamê komelî tewiro radîkal ramojno. Ganî şar îradeyê xo ramojno û vera îşxal û xayînîye vengê xo berz bikero.

Şarê Başûrê Kurdîstanî verê rejîmê Sedamî de milê xo çewt nêkerd, şarê Vakurî rixmê qirkerdişan teslîm nêbi, şarê Rojhilatî çarçirayî ciwîyayî la azadîye canêverda. Rojawan û Şingal de şarê ma DAÎŞî rê da vînîkerdene. Şarê ma yê Mexmûrî tim sereberz tewirê bianorî ramojeno. Teberê welatî de şarê ma tim wayîrê wezîfeyê xo vejîyeno. Cinîyê kurdan sefanê verênan ê nê têkoşînê bêhempa de ca yê xo genê. Ewro şarê kurdî xeta Rayber Apoyî de bihêz o. Êyê ke çar leteyan de vera şarê kurdî xizmetê dişmenî kenê do înan ra hesab bêro persayene. Ganî ma xeta yewîya neteweyîye de xopawitişî, têkoşînî komelkîyî pîlêr bikerê, ke estbîyayîşê xo bipawê û ser bikewê. Bitaybetî cinîyê ke Kongreya Neteweyîye ya Cinîyan ê Kurdan de ca genê ganî vera nê tehlukeyî tewirê tarîxkî ramojnê.

Ma xoverdayîşê bêhempa yê heme hemrayanê xo yê gerîlayan pîroz kenê û şehîdanê xo yê qehreman bi hurmet yad kenê.''