Koordînasyonê PAJKî derheqê serewedaritişê vera rejîmê Îranî yo ke badê qetilkerdişê Jîna Emînî dest pêkerd de eşkerayîye daye û nê vatî:

‘’Rejîmê Îranî sey sîstemêkê zorba û cinskî têna hetê caardişanê polîtîkan ra nê, cara pêro pîya sey rejîmî problemin o. Dişmenê cinîyan û vera azadîye yo, vera demokrasîyî yo. Hêrişo ke şexsê cinîyan de ame kerdene vera heme kurdan û şaranê Îranî yo. Cinîyê ke badê qetilkerdişê Jîna Emînî pê slogana Jin, Jiyan, Azadî wiriştê payan ser, sere wedarit bi têkoşînê topyekunî wazenê sîstemî qoqê ci ra bibedilnê. Cinî û şarî bedilnayîşê demokratîkî wazenê. Ma îradeyê azadîye yê cinîyan û şaranê Rojhelet û Îranî selam kenê.

Şarê ma yê kalkan, kurd, fars, azerî û belucî yo ke wirişt payan ser, hêzê ci est o ke qederê xo tayîn bikero. Serhildanê şarî ke lezabez vila benê ercê ci yo tarîxî est o. No şorişê cinîyan o, nîşanê şorişê komelkîyî yo.  Serhildanê ke Rojhelatê Kurdîstanî û Îranî de vila benê serewedaritişê azadîye yê vera rejîmê dîktatorî yê Îranî yê. Siloganê Jin, Jiyan  Azadî yê ke Îran de berz benê vejîyayîşê azadîya tarîxkî yo. Slogana Jin, Jiyan, Azadî manifestoya înşayê sîstemê demokratîkî yê neweyî ya.

Hinî prosese azadîye dest pêkerd ke peyser agêrayîşê ci çîn o. Têgêrayîşê şarî yo ke serkêşîya cinîyan de ame averberdene do heta serkewtişî têkoşîn bikero.  Wextê ci yo ke pê şorişê cinîyan şorişê demokratîkî yê yê Îranî bêro kerdene. Ganî vera rejîmê zorbayî heta serkewtişî têkoşîn bêro esasgirewtene. Coka ganî warî nêrê caverdayene û têkoşîn bêro xurtkerdene. Ganî heme cinîyê dinya wayîrê nê şorişê cinîyan vejîyê. Wa şarê ma yê çar leteyanê Kurdîstanî û teberê welatî paştî bido serewedaritişê vera rejîmê Îranî. Ma sey Partîya Jîna Azad Kurdîstan-PAJK  paştî danê cinîyan û şarê xo. Cinîyê Rojhelatê Kurdîstanî û Îranî têna nîyê.’’