Koordînasyonê PAJKî bi wesîleya serrgêra 16. ya çalakîya Vîyane Soran de eşkerayîyêke daye. Eşkerayîye wina ya:

''Ma têkoşere û milîtana raybere ya xeta Rayber Apoyî embaze Vîyane Soran serrgêra 16. ya şehadetê ci de yad kenê. Şexsê embaze Vîyane de ma pêro şehîdanê 'Şima nêeşkenê tîja ma tarî bikerê' yad kenê. Ma vera Komployê Mîyanneteweyî yê serê Rayberîye hêrsê qesasî û nefretê xo anê ziwan, verê xoverdayîşê Rayberîye û şehîdanê ma de sozê berzkerdişê têkoşînî dibare kenê.

Hêzanê komplogeran 15ê sibata 1999î de pê tepiştişê Rayber Apoyî waşt ke îradeyê şaran û cinîyan çin bikerê, têgêrayîşê PKKyî tasfîye bikerê û şarê kurdî reyna qir bikerê. Rayber Apoyî û şehîdanê ma pê xobverdayîş û ruhê fedayî cewab da nê komplogeran. Vera komplogeran hêrs û tewirê şarê ma, perwerî û bawerîya cinîyanê kurdan tarîxî bîyî. Embaze Vîyane sey milîtanêka xeta azadîye nameyê xo tarîxî ser o nuşt û vera komplo û faşîzmê camêrd-dewlete tewiro tewr radîkal mojna. Embaze Vîyane têkoşînê azadîya cinîyan de bîye krîterê perwerî, bawerî û pawitoxa xeta azadîye û averberdişê paradîgmaya neteweya demokratîke ya Rayber Apoyî.

Embaze Vîyane emrê xo yê ciwanî de Başûrî ra tewra têgêrayîşê ma bîye. Aye bi bawerîya xo, bi perwerî û zanayîşê xo sey milîtanêka Apogîre rolê rayberîye girewt xo mil. Embaze Vîyane tim vera kanwazîye û tewirê nakokî wayîra tewirêkê tesîrînî bîye. Embaz û perwera Rayber Apoyî Vîyane 2004 de vera hêzanê komplogeran û xeta îxanetî mîyanê komîteya newe ra awankrdişê PKKyî de ca girewt. Aye mîyanê na komîte de rolêko pîl ard ca û paradîgmaya neteweya demokratîke aver berde.

Komployo Mîyanneteweyî yê vera Rayberîye hema zî dewam keno. Vera komplo û tecrîdê giranî Rayber Apo bi tewirê tarîxî xo ver dano. Xeta embaze Vîyane û bi hezaran şehîdan de têkoşînê azadîye rê dewam keno. Şarê ma û milîtanê xeta Rayberîye rayberîya cinîyan de seba azadîya Rayberîye têkoşînêkê pîlî kenê.  Gerîlayê azadîye xeta Vîyanan de Heftanîn, Metîna, Zap û Zagrosan de bi îradeyêkê pîlî, vera faşîzmê AKP-MHPyî û bêbextîya PDKyî xoverdayîşê tarîxî nusenê. PDK seba menfatanê xo hetê dewleta tirke de ca gêno. Tewirê embaze Vîyane û mesajê ci vera nê îxanetî bi. Fedayîyanê Girê Sori Werxelê û Zendûra reyna mesajê Vîyane şerê şarî yê şorişgêrî de kerd yew û binê şîarê 'Şima nêeşkenê roja ma tarî bikerê' xo ver da û ser kewtî.

Nê prosesî de bi tewir û perwerîya pîle ya embaze Vîyane ma eşkenê armancê komplogeran çin bikerê. Sey partîya Cinîyan ê Azadan a Kurdîstanî ma nê prosesî de pîlkerdiş û caardişê têkoşînî sey erkêkê xo vînenê. Ma bi gandarkerdişê ruhê Vîyanan, Bêrîtan û Zîlanan eşkenê têkoşînê pîlî yê azadîye ser bivisnê û azadîya Rayberîya xo bîyarê ca.

Nê esasî ser o ma venga pêro cinîyanê Başûrî û Kurdîstanî danê ke bi ruhê Vîyanan Hemleya Wextê Azadîye de ca bigêrê. Senî ke embaze Vîyane bi tewirê xo, bi bawerî û perwerîya Rayber Apoyî û xeta PKKyî  prosesê tewr çetinî yê têkoşînî de wayîrê xeta cuya azadîye vejîyê, oxirê ney de têkoşîn bikerê, nê prosesî de zî ganî her cinîya kurde û milîtanê Apogîrî xeta Vîyanan de têkoşîn bikerê, bi heman ruhî wayîrê xoverdayîşê tarîxî yê Rayber Apoyî vejîyê.

Ma reyna şexsê embaze Vîyane Soran de pêro şehîdan bi heskerdişî û rêzdarî yad kenê. Ma sozê xo yê seba şehîdan dibare kenê.''