Koordînasyonê Partîya Azadîya Cinîyan a Kurdîstanî (PAJK) bi wesîleya serrgêra 25. ya çalakîya fedayîye ya Zeynepe Kinaci (Zîlane) keyepelê xo yê înternetî de eşkerayîyêke daye.

Eşkerayîya PAJKî wina ya:

''Ma afernayoxa xeta fedayîye û manîfestoya cuya azade embaze Zîlane (Zeynepe Kinaci) serrgêra 25. ya şehadetê ci de bi heskerdiş û minetî yad kenê. Şexsê şehîdanê menga hezîrane de ma pêro embazanê şehîdan û şehîdanê Hemleyanê Cengê Xabûrî û Bazanê Zagrosî yad kenê. Ma bawerî û sozê pawitişê erjanê şehîdan newe ra  kenê.

Serra 1996î de dewleta tirke ya îşxalkere pê hemkarîya hêzan ê mîyanneteweyîyan, vera Rayber Apoyî hêrişêk kerd. Vera nê hêrişî û komployê serê Rayberîye embaze Zîlane 30ê hezîrana 1996î de merkezê Dêrsimî de çalakîya fedayîye kerde. Embaze Zîlane pê çalakîya xo ya fedayîye cewab da komplogeran û mesaj da ke komplo qetî do ser nêkewo. Rayberîye çalakîya embaze Zîlane wina pênase kerde: 'Zîlane nameyê yewkerdişê serkewtişî û eşqî yo.' Embaze Zîlane pê pênaseyê 'Îdîaya min a cuye zaf pîl a. Ez wazena biba wayîrê cuyêka manadare û çalakîyêka pîle' kulturê Mezpotamyan newe kerd. Encax şorişgêrêke eşkena wina zelal hîsanê xo îfade bikera. Coka têgêrayîşê ma yê azadîya cinîyan esasê xo raştîya Zîlane ra gêno.

Tarîxê têkoşînê ma de, metodê çalakîya embaze Zîlane prosesêko newe yê ruhê fedayî aver berd. Hînî fedayîtî û rayberîya cinîyan Kurdîstan de bîyî krîterê sereberzîya cuye, şer û têkoşînê kurdan. Pê kesayetê embaze Zîlane raştîya xoverdayîşî ya cinîyan ê kurdan ameye afernayene û bîye nasnameyê cinîya azade. Kurdîstan de xeta Zîlane seba cinîya kurde bîya krîterê têkoşînî de israr, cuye û şer de serkewtiş. Ma sey têgêrayîşê azadîye yê cinîyan nê destkewteyanê tarîxîyan û raştîya pîle yê Rayberîye û şehîdan ser o têkoşîn kenê.

Nê rojanê tarîxîyan de şerêko giran yeno kerdene ke netîceya ci do tesîra ameyoxê kurdan bikero. Sere de Herêmanê Pawitişî yê Medya de, Botanî ra heta Amedî de şerêko çetin qewimîyeno. Têgêrayîşê ma rê tasfîye yena ferzkerdene. Nê hêrişê dewleta tirke yê vera gerîlayan netîceya planê qirkerdişê kurdan de yenê kerdene. Vera nê hêrişanê topyekûnan gerîlayê HPG û YJA-Starî xeta Zîlane de pê ruhê fedayî cewab danê dişmenî. Gerîlayî û şerwanîya modernîteya demokratîke karakterê şerê şorişgêrî yê şarî yê. No tewirê gerîilayan milîtanbîyayîş û şorişgêrîya nê çaxî yê. Fedayîyê Bazanê Zagrosî û Cengê Xabûrî xeta Fermandare Zîlane nîşan kenê û pê na bawerî tewrê cengî benê, xo resnenê ruhê şorişgêrî yê nê dewrî. No dewro tarîxî heman wextî de erk û mesuldarîyan keno milê ma.

Vera îşxal û faşîzmê AKP-MHPyî, vera dişmenê şaran û cinîyan ma sey têgêrayîş û şarê kurdî ganî pê ruhê fedayî, pê metodê embaze Zîlane têkoşîn bikerê û nê dewrê tarîxî de destkewteyanê şarê kurdî bîyarê ca û erjanê têkoşînê cinîyan bipawê.

Ma nê esasî ser o reyna şexsê şehîdanê hezîrane de embazan Zîlane, Helmet, Nûjîne Sêrt, şehîdanê Mamreşo û Zendûra de pêro şehîdan bi rêzdarî û heskerdişî yad kenê. Ma soz danê ke do xeyalanê şehîdan bîyarê ca. Ma sey milîtananê xeta Apogîre û embaze û şerwane Zîlane vanê ke hêriş senî beno wa bo raştîya Zîlane û ruho fedayî yê gerîlayan do nê hêrişan çin bikerê û serkewtiş bo ê şarê ma û têgêrayîşê azadîya cinîyan.''