Koordînasyonê PAJKî keyepelê xo yê înternetî de eşkerayîyêke weşanayene û serrgêra ci ya şehadetî de Bêrîtane (Gulnaze Karataş) û pêro şehîdê menga teşrîna verêne yad kerdî.

PAJKî vat: ''Ma bi na wesîle fermandara ma ya manewîye embaze Bêrîtane Hêvî (Gulnaze Karataş) bi rêzdarî yad kenê û ronayîşê artêşbîyayîşê cinîyan pêro embazan rê fîraz kenê.''

PAJKî vist vîrî ke menga teşrîna verêne hem menga Komployê vera Rayberê Şarê Kurdî Abdullah Ocalanî ya hem zî menga îşxalê Girê Sipî û Serêkanîyê ya.

PAJKî bale ante ser ke reyna 9ê teşrîna verêne ya 2020î de dewleta tirke, Iraq û PDKyî vera Şingalî planêko komploger amade kerdo û vat: ''La şarê kurdî wayîrê tradîsyonê xoverdayîşî yo. Şarê kurdî qetî vera hesabanê gemarinan sereyê xo nêard war, xo ver da û bi nê hawayî estbîyayîşê xo pawit. Ewro zî nê xetê xoverdayîş û qirkerdişî têvera yê. Coka wezîfeyê pêro kadroyanê partîye yo ke şehîdanê menga teşrîna verêne bişinasnê, xo rê nê şehîdan esas bigêre û mîras û fermanê înan ê xoverdayîşî bîyarê ca.''

PAJKî da zanayene ke Bêrîtane kerraya mihenge ya artêşbîyayîşê cinîyan a û vat: ''A şerê Başûrî vera xeta teslîmîyetî vinderte û pê raştîya xo ya xoverdayîşî cewabê na xete da. Seke Rayberîye eşkera kerdbi xeta Bêrîtane xeta xoverdayîş û azadîye yo. Tewirê embaze Bêrîtane ma rê ferman o ke ganî ma zî sey ci têbigêrê.''

Heman eşkerayîye de şehîdê menga teşrîna verêne Azîme (Mihribane Saran), Zeynepe (Gurbeteli Ersoz), Meryeme (Meryeme Hazar Çolak), Ronahî (Andrea Wolf), Bermale (Gulere Otaç), Rewşene (Leyla Kaplan), Sarya (Nursele Înce), Saadete Silopî, Canda (Saneme Sertap Golge), Hêlîne Çerkez (Nermin Akkuş), Nergîse Qamişlo, Mizgîne Turk (Husne Akgul), Rotînda (Aynure Artan), Kurdê (Selamete Menteş), Dîlane Dilsoz (Taybete Dayan), Tanya (Ebru Guneş), Rûkene Bingol, Rojîen Gewda, Arîne Mîrkan, Rêwane ameyî yadkerdene.

PAJKî vat: ''Menga teşrîna verêne menga şehîdan ê cinîyan  a. Wext wextê xoverdayîşî yo. Ma ganî bi hawayêk normalî nêzdîyê nê prosesî mebê. Ganî pêro cinîyî dormeyê xo de xoverdayîşî rêxistin bikerê. Eke wina bibo ma do bieşkê derba peyêne bidê dewleta faşîste ya ke qels biye û aye bierzê çopanê tarîxî mîyan.''