Parlamenterê Partîya Sosyalîste ya Swîsre û endamê Komîsyonê Têkilîyanê Teberî Fabian Molina, Parlamenterê Partîya Lîberal-Radîkale Alex Farinelli, Parlamenterê Yewîya Demokratîke ya Federale Erich Vontobel, Parlamenterê Partîya Keskan Balthasar Glaettli û Parlamenterê Fraksîyonê Merkezî (Die Mitte) Stefan Muelller-Altermattî vernîyazêk pêşkêşê Konseya Fedarele kerd û tede bale ante hêrişanê îşxalî yê dewleta tirke û SMOyî ser.

Parlamenteran bale ante gefanê vera Îdareyê Xoserî yê Rojawanî ser û venga Konseya Federale da ke vera hêrişan cade têbigêra.

Vernîyaz de ame parekerdene ke hêrişê dewleta tirke yê vera herêmanê Îdareyê Xoserî aramîye herimnenê û vat: ''Nê hêrişî vera kurd, armenî, sûryanî, êzidî û xirîstîyanan tehlukeyê cidî yê.''

Parlamenteran îfade kerd ke nê hêrişî DAÎŞî zî gandar kenê û vat: ''Bêaramîye bena sebeb ke cergê DAÎŞî newe ra bêrê xo ser. Swîsre mesuldar a ke verê naye bigêra.''

Parlamenteran wina venga Konseya Federale ya Swîsre da: ''Konsey seba pawitişê etnîsîte û dînanê Sûrîye û qedînayîşê hêrişanê vera Rojawanî, seba kêmînayîşê alozîye ganî hacetanê polîtîkaya teberî bişuxilna.''

Panc partîyanê sîyasîyan ê cîyayan ra xeylê parlamenteran morê xo da binê vernîyazî.