Vera hêrişanê dewleta tirke û cerganê ci yê serê Îdareyê Xoserî nêrazîbîyayîşî dewam kenê. Serekkomarê Fransa yê verênî François Hollandeyî weşanêkê gandarî de hêrişî ercnayî.

Hollandeyî derheqê eşkerayîya Sereka Komîsyonê Ewropa Ursula von der Leyen ya 'Yewîya Ewropa ganî têkilîyanê xo yê bi HTŞyî bizêdîna' de vt: ''Ez wazena tîya ra hişyar bikera ke HTŞ hem koma îslamîste ya hem zî terefgîrê Tirkîya yo. Komê hîna demokratîkî zî est ê. Ma do bivînê ke herême de nê komî se bikerê.

Hêrişê vera kurdanê Sûrîye nêbenê. Têkoşînê vera DAÎŞî de nê kurdan hetkarîya ma kerde. Eke kurdanê Sûrîye ra nêbîyêne mumkîn nêbîyêne ke DAÎŞ Sûrîye ra bêro vetene. Fransa paştî daye kurdan. Ez nêeşkena terikîyayîşê kurdan nêvîna. Kurdê Sûrîye nika bi hezaran tepişteyanê DAÎŞî kontrol kenê. Eke nê kesî serbest bibê do xo biresnê erdê ma zî.''

Hollandeyî seba pawitişê Îdareyê Xoserî veng da û vat: ''Ganî xoserîya kurdan rê hûrmet bêro mojnayene. Îdareyê Xoserî têkoşînê vera terorîzmî de rolêko pîl kay kerd. La no nêno a mana ke ganî ê Sûrîye ra cîya bibê. Yanî ez vana ganî ê pîya biciwîyê.

Ganî Fransa nînan bipawê. Fransa û koalîsyono ke seba têkoşînê vera terorîzmî ameyo awankerdene ganî înan bipawê. Serebûtê ke Sûrîye de qewimîyenê xora tesîrê erdê ma zî do bikerê.''