TJK-F û CDK-Fyî bi eşkerayîyêke bernameyê çalakîyanê seba şermezarkerdişê Qirkerdişanê Parisî eşkera kerd û venga pêro kesan da ke tewrê çalakîyan bibê.

Eşkerayîye de dîya zanayene ke Paris de 9ê çeleyê 2013î de Sakîne Cansiz (Sara), Fîdane Dogan (Rojbîne) û Leyla Şaylemez (Ronahî) û 23yê kanûna 2022yî de Emîna Kara (Evîne Goyî),  Mîr Perwer û Abdurrahman Kizil ameybî qetilkerdene. 

Wird dezgehan îfade kerd ke hesabê nê qirkerdişan nêameyo perskerdene, dewleta Fransa raştîyan nimnena û hemkarîya dewleta tirke kena. 

Wird dezgehan vat: ''Ma do her serre hesabê nê qirkerdişan serrgêranê înan de dewleta Fransa ra bipersê. Ma ancî persenê ke gelo bêvengîya şima nîşaneya hemkarîya şima ya? Ma vanê ke hesabpersayîşê nê qirkerdişan wayîrvejîyayîşê Şorişê Rojawanî yo ke mîrasê pêro şehîdanê ma yo.

Bi şîarê 'Kiştox dîyar o! Fransa çira bêveng a!' ma do 21ê kanûne de dest bi çalakîyanê xo bikerê. Ma venga pêro cinîyan ê kurdan, şarê xo, hêzanê sosyalîstan û demokratîkan danê ke tewrê nê çalakîyan bibê.''

Bernameyê çalakîyan wina yo: 

23yê Kanûne: Verê Merkezê Komelê Kurdan ê Ahmet Kayayî de wextê saeta qirkerdişî de 11.37 de rêz do bêro girewtene. Dima dengbêjî do bêrê goşdarîkerdene. Saete 14.00 de kursîyo akerde do bêro ronayene. Dima 18.00 de bernameyê yadkerdişî do dest pêbikero.

*9ê Çeleyê 2025î: Temamîya Ewropa de verê sersefîrîyanê Fransa de çalakîyê protestoyî do bêrê kerdene. Saete 11.00 de Paris de verê Merkezê Komelê Kurdan ê Ahmet Kayayî ra heta Buroyê Enformasyonî yê Kurdan rayraşîyayîş do bêro kerdene. Dima verê buroyî de eşkerayîye do bêra kerdene. Saete 18.00 de zî panelî do bêrê kerdene.

*11ê çeleyê 2025î: Mîtîng, rayraşîyayîşo merkezî do bêrê kerdene. Rayraşîyayîş saetre 10.00 de verê Gare de Nordî ra dest pêbikero.''