Eyaletanê NRW û Rheinland-Pfalzî yê Almanya de felaketê laserî de bi seyan keyeyî xera bîyî. Laserî ra semed seferê trenî betal bîyî, zerar resa xetanê ceyran, gaz û awe. Laser de tewr tay 170 kesî merdî û hema zî 5 kesî vînîbîyaye yê.

Cinîyê kurdî yê Merkezê Komelê Demokratîkî yê Kurdan ê Euskirchenî paştî danê mexdûranê laserî. Hemsereka Merkezê Komelê Demokratîkî yê Kurdan Donê Îskanê derheqê paştdayîşê înan de ANFyî rê qisey kerd.

Donê Îskan pare kerd ke laserî ra dima ê cade şîyî hewarê merdiman û vat: ''Euskirchen de awe û ceyran çinbîyî. Ma bire daye ke xeyme ronê û werde vila bikerê. Roşa dişemeyî ma xeyme akerde û werdo germin pewt, kerd paketan û keyeyan ra vila kerd. Ma dî ke merdimî zaf xemgîn ê û bi rojan o çîyo germin nêwerdo. Ma bire daye ke zêdêr xeyman abikerê. Ma tewr tay 1000-1500 kesan rê werd, çay, qehwe û awe dayî. Meclîsê ma bi temamî tewrê nê karî bi.  

Şaredariya Euskirchenî paştdayîşê ma sey mîsalî mojna, ma rê sipas kerd. Mexdûran zî ma rê sipas kerd. Rojêke cinîyêka kokime ameye binê xeyma ma û vat ke aye dî ke ma bêcîyakerîye werd danê her kesî. Persa ke ma kam ê. ma vat ma kurd ê, a zî bermaya. Kênayêka qije dadîya xo reyde ameye verê xeyma ma. Resimo ke aye xêz kerdbi da ma. Serê resmî de bi almankî 'sipas kena' nusîyabi. 

Hela destpêke ra nata kurdîstanijan paştî daye mexdûran.Dikanê esnafan ê kurdan zî binê awe de mendî. Dima ke awe şîye esnafan dikanê xo akerdî û bi hawayêkê bêpereyî werd vila kerd. Heyva Sor seba paştdayîşî veng da. Merdimî awe, betanî, sol, şit ardî. Heyva Sor dewan ra gêraye û nê hetkarîyî vila kerdî. Meclîsê Cinîyan ê Kolnî zî paştî daye. Embazan mîyanê xo de pere arê da û da şaredarîye.''