Platformê 25ê Teşrîna Peyêne verê Operaya Sureyya ya Kadikoyî de dest pê çalakîyanê 25ê Teşrîna Peyêne Roja Têkoşînê Vera Şîdetê Serê Cinîyan kerd. Polîsan dormeyê platfromî girewt. Hemsereka HDPyî ya Îstanbulî Îlknure Bîrol zî tewra çalakîye bîye.

Çalakîye de nameyê platformî ser o Ruya Kurtuluş eşkerayîye wende û da zanayene ke rejîmê Erdoganî dişmenîya cinîyan keno, polîsî û hêzê dewlete camêrdan reyde cinîyan rê şîdet kenê, mehkemeyî seke xelate danê camêrdanê kiştoxan bêceza verdenê.

Kurtuluşe îfade kerd ke vera nê kerdişan înan 20 serrî yo gamêke apey nêeşte û do nêerzê. Platformî venga pêro cinîyan da ke 25ê teşrîna peyêne de saete 19.00 de Tunelê Taksîmî de bêrê yewca û çalakîya xo bikerê.