Platformê Cinîyan ê Dêrsimî bi beyanatêkî bernameyê 25ê Teşrîna Peyêne ya Têkoşînê Vera Şîdetê Serê Cinîyan pare kerd û seba tewrbîyayîşî veng da.

Beyanat bînaya KESKî de ame parekerdene û temsîkarê partî û dezgehan tewrê ci bîyî. Nameyê Platformê Cinîyan ê Dêrsimî ser o endama Meclîsê HDPyî Nurşate Yeşîl qisey kerd û vat: "Seba ke şîdetê vera cinîyan bêro vindartene ma do emser zî meydanan de bibê. Heqê cinîyan nênê caardene û cinîyî her roje yenê qetilkerdene. Ma sey Platformê Cinîyan ê Dêrsimî seba ke waştişanê xo vajê, qanûnî bêrê caardene û qey cinîyan cîyatîya pozîtîfe bêra kerdene do meydanan de bibê. "

Bernameyê Platformê Cinîyan ê Dêrsimî wina yo:

19ê Teşrîna Peyêne: Seba cinîyanê tepişteyan mektubî do bêrê erşawitene

21-22ê Teşrîna Peyêne: Dezgehan û sazgehanê bazirganîye de seba ke bale bêra antene şîdetê serê cinîyan ser afîşî bêrê daliqnayene. Salona Konferansî ya Şaredarîye de film do bêro mojnayene

25ê Teşrîna Peyêne: Meydanê Seyîd Rizayî de saete 17:30 de beyanatê çapemenîye do bêro kerdene.