Cizîre, Wan û Agirî de polîsan hêrişê çalakîyanê 25ê Teşrîna Peyêne Roja Têkoşînê Vera Şîdetê Serê Cinîyan kerd û xeylêk cinîyî destbend kerdî.

Qezaya Cizîre ya Şirnexî de serkêşîya TJA de cinîyan rayraşîyayîşêk kerd. Polîsan hêrişê cinîyan kerd û tewr tay 17 cinîyî destbend kerdî. Nameyê cinîyan wina yê: Bêrîvane Kûtlû , Zilane Ecevit , Asumane Kulter , Sabuha Akdag , Gulere Tunç, Elfesya Nas, Evîne Erden, Garîbe Bîlîr, Medîha Akay, Zîlane Yaman, Zarîfe Borak, Bêrîvane Temel, Nebahate Îşçî, Kumru Babat, Songule Kuçuk, Elîfe Utun, Fehîme Sarihan.

Wan de cinîyî seba rayraşîyayîşî serkêşîya TJA de, verê bînaya Rêxistina HDPyî ya Wanî de kom bîyî. Polîsan cinîyî asteng kerdî û cinîyî pê sloganê "Jin jiyan azadî" tewir mojna polîsan. Polîsan bi gazê îsotî hêrişê cinîyan kerd. Wekîla HDPyî Muazzeze Orhan vera hêrişê polîsan vat: ''Cinîyî raştê şîdetê camêrdan û dewlete yê polîsan yenê. Ma ney qebul nêkerê, her ca de têkoşîn bikerê.''

Agirî de cinîyî verê bînaya HDPyî de ameyî pêser. Polîsan eşkerayîya cinîyan asteng kerde û Endama Îdareyê HDPyî Hatîce Akdag, Endama Meclîsê Pêroyî yê HDPyî Dîleke Karataş, Hemsereka DBPyî ya Agirî Melîke Ozmuş û cinîyê bi nameyê Leyla û Songule destbend kerdî.