Êlih de vizêr polîsan çarçeweya operasyonê qirkerdişê sîyasîyî de 15 cinîyê sîysetmedarê HDPyî û aktîvîstê TJA destbend kerdî. Merdîn, Êlih, Riha û Wan de destbendkerdişî ameyî protestokerdene.

Mêrdîn de rêxistina HDPyî verê banê xo de eşkerayîye daye.  Cinîyan pankarata Ma do bi îrade û têkoşînê cinîyan faşîzmî birijnê ame akerdene.Vervatoxa TJA ya Mêrdînî Eyleme Amak vat: ''Reyna cinîyê têkoşerî ameyî destbendkerdene. Hukm goreyê îqtîdarê sîyasîyî têgêreno. Wazenê cinîyan sîyasetê demokratîkî ra tesfîye bikerê, destkewteyanê înan çîn bikerê û cinîyan keyeyan rê heps bikerê. Ma do vera nê hêrişan û dişmenîya vera cinîyan bi pîlkerdişê têkoşînî cewab bidê. Nê polîtîkayê çokdayîşî senî ke vizêr ser nêkewtî ewro zî do ser nêkewê. Ma semedê înşakerdişê dinya ke cinîyî tede azad ciwîyene têkişînê xo pîlêr bikerê. Cinîyan ra bitersê, Çunke ma cinîyî do nê sîstemê camêrdê serdestî bibedilnê û şima do vîn bikerê.''

 Reyna Êlih, Riha û Wan de zî hêrişê vera cinîyan ameyî şermezarkerdene û semedê xurtkerdişê tekoşînî ame vengdayene.