13ê êlule de cinîya bi nameyê Jîna (Mehsa) Emînî (22) paytextê Îranî Tahran de hetê ‘’Polîsanê ehleqî’’ ra ameye tepiştene û pê îşkenceyî ameyî qetilkerdene. A roje ra nata çalakîyê şermezarkerdişî dewam kenê. Vizêr bajarê Hamburgî yê Almanya, bajarê Torontoyî yê Kanada û  bajarê Osloyî yê Norveçî de qetilkerdişê Jîna Emînî ame şermezarkerdene.

Hamburg de Meclîsê Cinîyan ê Rojbîne verê Konsolosxaneyê Îranî de çalakîyêke organîze kerde. Leyla Kayaya ke bi nameye meclîsî tîya qisey kerd bale ante polîtîkaya hêrişkare ya Iranî ke vera cinîyan yena rayraberdene ser. Kaya vat: ‘’Îran de bitaybetî qetilkerdişê cinîyan ê kurdan bîyo sîstemêkê dewlete. Welatê Ewropa zî vera qirkerdişê cinîyan bêveng memanê. Ma sey Têgêrayîşê Cinîyan ê Kurdan do tim vera kiştoxanê barbaran ê cinîyan xover bidê.’’

Toronto de zî   hetê Komunê Cinîya Azade ya Sara û  Meclîsê Şarê Kurdî ra bi eynî waştişî çalakîyêke ameye kerdene. Cinîyan veng da dezgehanê eleqedaran ê Ewropa ke wa bêveng memanê û derheqê qewimîyayîşî de cigêrayîş bidê destpêkerdene.

Oslo de zî verê Serseferîya Iranî de semedê paştdayîşê serewedaritişê şarî yê Kurdîstan û Îranî çalakîyêke ameye kerdene. Bi seyan kesanê ke ameyî têhet qetilkerdişê Jîna Emînî  û Şîlêre Resul şermezar kerd.Çalakîya ke hetê KJAR û PJAKî ra ameye organîzekerdene de xeylêk partî û dezgehan zî paştî daye ci. Çalakîye de xeylêk kesan semedê şermezarkerdişî gijîkê xo qesna.