Îdarekaranê Komeleya Cinîyan a Rosa ra Avûkate Berfîne Polat derheqê qirkerdişê cinîyan, hişmendîya camêrdan û mesuldarîya dewlete ser o ANFyî rê qisey kerd.

Avûkate Berfîne Polat ard ziwan ke Tirkîya de kişîyayîşê cinîyan pê polîtîkaya bêcezaverdayîşî ya dewlete yenê teşwîqkerdene û vat: ''Tirkîya de xeylêk nasnameyê 'bînî' estê. Mîsal sey Denîze Poyraz bîyayîşê cinîya kurde zehmet o. Wexto ke nasnameyê bînî-cîyayî yewca de pêser benê asta şîdetî heta şîdet bi xo vurîyenê. Dezgehê cinîyan wextê qirkerdişê cinîyan de eşkenê bibê yew la wexto ke nasnameyê cîyayî benê babete no yewbîyayîş nêqewimîyeno. Çunke her nasnameyo bîn-cîya asta cîya de maruzê cîyakerî-şîdetî maneno. Mîsal hem kurdbîyayîş hem zî cinîbîyayîş pîya zehmet o.

Têna temmuze de 20 cinîyî kişîyayî û 12 cinîyî bi hawayêkê şikdarî merdî. Xêrê têkoşînê cinîyan ra hînî nê cînayetî asenê. Şîdet û qirkerdişê vera cinîyan polîtîk ê çunke netîceyê pratîkanê mekanîzmaya muhakeme û erkê sîyasî de qewimîyenê. Eke dewlete cinîyan nêpawa û faîlan rê ceza nêda no beno qirkerdişê cînsî ke nê welatî de esto. Nika na rewşe bîya sîstematîl. Cinîyî aver şinê, xo rêxistin kenê; dewlete pê ney qayîl nîya. Coka dewlete qirkerdişê cinîyan de bena terefê faîlan û bêveng manena.''

Avûkate Berfîne Polat îfade kerd ke tay medyayî pê ziwanê xo qirkerdişê cinîyan meşrû kenê û vat: ''Nê xeberan de ganî zaf ca nêro dayene îfadeyê faîlan û çekuyê 'namus, hêrs, cînet, nêweşîye' nêşuxilîyayî. Medya ganî bale biance nînan ser ke cinîyî rixmê ke wazenê nênê pawitene û yenê qirkerdene.''