Goreyê raporê '8 mengan de cînayetanê vera cinîyan' ê Federasyonê Komeleyanê Cinîyan ê Tirkîya mabênê 1ê çeleyî-31ê tebaxa 2024î de tewr tay 280 cinîyî hetê camêrdan ra ameyê qetilkerdene û 50 cinîyan zî bi hawayêkê şikdarî dinyaya xo bedilnaye.

Aktîvîsta TJA Bahare Peker derheqê babete de ANFyî rê qisey kerd û ard ziwan ke polîtîkaya bêcezaverdayîşî ya vera cînayetanê cinîyan zêdîyena.

Bahare pare kerd ke kişîyayîşê cinîyan û polîtîkayê bêcezaverdayîşî polîtîkayê şerê taybetî yê. Bahare vat: ''Kişîyayîşê cinîyan bi wedarîyayîşê qanûnê 6284î û Peymana Îstanbulî zêdîyayî. Teyna menga tebaxe de 31 cinîyî û 5 domanî ameyî qetilkerdene. Bingeyê nê pêro kiştişan de polîtîkaya bêcezaverdayîşî est a. Cinîyî hinî bi rehetî nêeşkenê vejîyê teberî.''

Bahare Peker bale ante qetilkerdişê Narîne Guran ser û vat: ''Serebûtê Narîne Guran hetê pêro dinya ra yeno teqîbkerdene. No serebût zî netîceyêka polîtîkaya şerê taybetî ya. Qetilkerdişê Narîne de keyeyê ci zî cagirewto. Polîtîkayanê bêcezaverdayîşî ra verê cînayetanê winayênan yeno akerdene.''

Bahare îfade kerd ke îqtîdar û dewlete wazenê Kurdîstan de binê muhafazakarîye de kulturêkê bêeslî awan bikerê û vat: ''Ma sey cinîyan ganî vera hişmendîya serdestîya camêrdan xoverdayîşî aver berê. Ma do vera qirkerdişê cinîyan destê ma ra çi bêro bikerê û têkoşînê azadîye pîlêr bikerê. Heman wextî de ma do seba awankerdişê komelêkê exlaqî û polîtîkî têbigêrê.''