Merkezê Çapemenîye yê Hêzanê Sûrîyeya Demokratîke (QSD) da eşnawitene ke 2ê temmuze de fermandaranê înan ra Mizgîne Kobenê (Sîhame Mislim) hêrişê dewleta tirke yê vera Reqa de şehîde bîye.

 Eşkerayîye de wina ame vatene:

''Hêrişê dewleta tirke ya îşxalkere û çeteyanê ci yê vera Şorişê Rojawanî zêdîyenê. Îxalkerî wazenê ke şorişî çîn bikerê. Dewleta tirke ya ke heq û hêzê cinîyan qebul nêkana bitaybetî hêrişê cinîyan kena. Ma sey hêzanê pawitişî yê Rojawanî vera nê hêrişan do bêveng memanê û têkoşînê xo xurtêr bikerê.

Dewleta tirke ya îşxalkere û çeteyanê ci 2ê temmuze de bi droneyanê çekderan Reqa de hêrişê wesayîtêkî kerd. Netîceya hêrişî de fermandaranê ma ra Mizgîne Kobanê şehîde bîye û di embazî zî birîndar bîyî. Me keyeyê şehîde Mizgîn Kobanê rê serweşîye wazenê û sozê pawitişî welatî û serkewtişî danê.

Zanayîşê nasnameyê şehîdî wina yê:

Nameyê Qodî: Mizgîne Kobanê

Name û Peyname: Sîhame Mislim

Nameyê Maye: Emîne

Nameyê Pîyî: Ehmed

Tarîx û Cayê  Bîyayîşî: Kobanê/1990

Tarîx û Cayê Şehadetî:  2ê Temmuza 2022yî / Reqa

Fermandare Mizgîne Kobanê  ya ke Kobanê de keyeyêkê welatperwerî de yena dinya, bi xeyalanê Kurdîstanê azadî û cigêrayîşê azadîye sereyê Şorişê Rojawanî de tewrê şorişî bena. Xeta cinîya azade de Helebî ra heta Serêkanîye têkoşînê azadîye xemilnena. Fermandare Mizgîne Kobanê hela verêne ya tewrbîyayîşî ra heta şehadetê xo bi hewayêke qerardarî şer kena û  bi felsefeya xelisnayîşê cinîyan sey heme şehîdan şina dişmenî ser û bena ters û xofê înan.''