Yewîya Resnayîşî ya Cinîyan ê Kurdîstanî (RAJIN) bi wesîleya 22ê Nîsane Roja Rojnamegeranê Kurdan eşkerayîya nuştekîye daye.

Eşkerayîye de Roja Rojnamegeranê Kurdan sere de Rayberê Şarê Kurdî Abdullah Ocalan, şarê Kurdîstanî, cinîyan ê xoverdayoxan ê kurdan û kedkaranê çapemenîye rê ameye fîrazkerdene û nê ameyî vatene: ''Ma şexsê şehîda peyêne ya çapemenîye embaze Delîla Çîya de şehîd Gubettelî Ersoz, Şîlane Aras, Şervîne Bîngol, Denîze Firat, Nûjîyane Erhan, Sarya Onur, Selçuk, Halîl Dag, Rizgar û heme şehîdanê çapemenîye yad kenê û soz danê ke ma do rêçê heqîqatî de şirê û xîyalanê înan bîyarê ca.

22ê Nîsane ya 1898î de paytextê Misirî Kahîre de rojnameyê Kurdîstanî yo ke rojnameyo verên ê kurdkî yo vejîya. Rojnameyê Kurdîstanî wexto ke nameyê kurd û Kurdîstanî nêameyene şuxulnayene de vejîya. Wexto winayên de vetişê rojanmeyê Kurdîstanî gamêke cesûr bî ke na roje tarîxê şarê kurdî de sey Roja Rojnamegeranê Kurdan ameye qebulkerdene. Çapemenîya azade ya kurdan zî pê nê mîrasî Kurdîstan de resaye merheleyêka newîye. Pê kede û fedakarîya çapemenîya azade ma heta ewro ameyî. Rayber Apoyî serê fikranê cinîyan ra çapemenîya azade aver berd. Nê averşîyayîşî pîya bi têkoşînê 40 serran ê têgêrayîşê azadîye rayîrê cuyeyêka newîye akerd. Mîmarê na cuye bêşik xoverdayoxo pîl Rayber Apo yo.

Ma sey RAJIN semedê pawitiş û averberdişê ercanê neteweyî û komelkî yê ke ameyî afernayene, berpirsîyar ê. Ma xo sey taqîpkerê rojnamegera şorişgêre Gurbetelî Ersoz vînenê. Embeze Gurbetelî Ersoz rojnamegera cinîye ya verêne ya tarîxê mucadeleyê ma yê neteweyî bî. Sey fermandare û serkêşêke pê kamera û qelema xo semedê azadîya şarê xo mewzîyanê vernî yê şerî de destanê çapemenîya azade nuşt. Cinîyê ke her ca de vera zîhnîyetê nêrî têkoşîn kenê warê çapemenî de zî têkoşînê xo domnenê. Çapemenîya azade do pê kamera û qelema xo bibo çim, goş, veng û wîjdanê komelê kurdan.

Hêzê kapîtalîst û îşxalkerî bi heme îmkananê xo şerêkê topyekun rayra benê. Medya zî vera komelî sey çeke şuxulnenê. Wazenê ke komelî teslîm bigîrê û bikerê bênasname. Nê prosesî de  semedê pîlkerdişê hemleya Dem demê azadîye yo wazîfeyo pîl ê çapemenîya azade yo. Şehîdê çapemenîya azade heta peynî cigêrayîşê heqîqatî canêverda. Mewzîyanê tewr zehmetan xo ver da. Şehîd Gurbete, Fayîq, Xelîl, Denîze, Şîlane, Rizgar, Nûjîyane, Arhat, Hîndîstan, Fîraz, Dîlovan û bi seyan hemrayanê ma sey cigêrayoxê heqîqetî pelanê tarîxî de cayê xo girewt. Ma zî ewro serê nê ercan de xo rêxistin kenê û resnenê. Ma reyna Roja Rojnamegeranê Kurdan heme xebatkaranê çapemenîya azade û şarê Kurdîstanî rê fîraz kenê. Heta ke cigêrayoxê heqîqatî bibê her wext do cuyeyêka azade û komelêko azad bibê.''