Çapemenîya Azade ya Cinîyan (RAJIN) derheqê Rojnamegere Denîze Firata ke 2014 de hêrişê çeteyanê DAÎŞî yê vera Mexmurî de şehîde bîye de eşkerayîya nuştekîye daye.

RAJINî vist vîrî ke çapemenîya cinîyan a kurdan ewro pê kede û raştîya şehîdanê çapemenîye xo pîl kena û nê vatî: ''Ma emaze Denîza ke eşiqê cuya azade bî serrgêra şehadetê ci yê 7. de bi heskerdiş û hurmetî yad kenê. Reyna ma şexsê embaze Denîze de heme şehîdanê çapemenîya azade yad kenê. Her dewrê tarîxê têkoşînê kurdan de sey serkewtişanê girdan bedelê girdî zî estê.

2014 de çeteyanê DAÎŞî hêrişê Kampa Şehîd Rûstem Cûdîyî (Mexmûr) kerd. La çeteyanê ke waştêne qirkerdiş bikerê raştê têkoşînê şar û têgêrayîşê ma û yê Denîze Firata ke têkoşîno tarîxî teqîpkerdêne ameyî.

Embaze Denîze sey cinîya têkoşêra jîhate û cigêrayoxê heqîqetî, cuyêka tewr zore ke bedelan girdan wazena vîjnaye. Seba ke hêrişanê wehşîyan ê çeteyanê DAÎŞî ramojnê heme dinya şehîde bîye. Heta a roje zî tim sefanê verênan ê şerî de xeberî kerdî.

Rojnamegera delale û hemraya ma ya şorişgêre Denîze Firat 1990 de hema ke domane bî rîyê hêrişê dewleta tirke ra pîya bi keyeyê xo mecbur mende ke herra xo ra vejîyo. Hemra Denîze raştîya şerî hema ê serranê xo de fehm kena. Hem şerê Kurdîstanî rê hem zî têkoşînê pîlî û bedelanê girdan rê şahîdîye kena. Hemra Denîza ke kewte rayîrê têkoşînî rêçê Gurbetelî Eroz de xo aver berde û pê qeleme, dimenan û fotografanê xo bîye veng û rengê gerîlayanê Kurdîstanî. Eynî wextî de pê cuya  û hîkayeya xo zî bîye leteyêkê nê têkoşînê bêhempayî. Ma zî rêçê hemrayanê xo serkêşan sey Denîze û Gurbetelî de do têkoşîn bikerê.

Na çarçewe de cinîyê ke wazenê bibê teqîpkarê heqîqetî ganî Denîzan sey nimune bîgirê. Denîze wexto tewr zehmet ê têkoşînî de keda pîle daye. çapemenîya cinîyan a kurdan ewro pê kede û raştîya şehîdanê çapemenîye xo pîl kena. Ma pê mîrasê Gurbetelî Ersoz, Denîze, Nujîyane, Sarye, Şîlane û bi desan hemrayanê xo yê bînan xo rêxistin kenê ke wa raştîye tarîtîye de memanê.

Ewro vera hêrişê vera cinîyan û şarê kurdî têkoşîno xurt yeno kerdene. Ma sey teqîpkaranê Denîzan seba ke bibê vengê cinîyan  ê ke nê têkoşîn û xoverdayîşê tarîxî rê serkêşîye kenê, ma do qerardar berpirsîyarîya xo bîyarê ca. Ma reyna embaze Denîze û heme şehîdanê çapemenîya azade yad kenê û sozê ke ma dayo înan reyna newe kenê.''