Platformê Rojnamegeran ê Cinîyan ê Mezopotamya (MKGP) serrgêra şehadetê rojnamegere Denîze Firat de raporê binpaykerdişê heqanê rojnamegeran ê cinîyan ê 7 menganê 2022yî bi kombîyayîşêkê çapemenîye eşkera kerd. Kombîyayîş bînaya Komeleya Rojnamegeran a Dîcle-Firatî (DFG) de ame kerdene û Hemsereka DFGyî Dîcle Muftuoglu û xeylêk rojnamegerê cinîyî zî tewrê kombîyayîşî bîyî.

Tirkîya raporî hetê Edîtora Jinnewsî Habîbere Eren ra û kurmanckîya ci zî hetê Vervatoxa MGKPyî Roza Metîna ra ame wendene.

Eşkerayîye de verî Denîze Firata ke 8ê tebaxa 2014î de hêrişê cerganê DAÎŞî de Mexmûr de şehîd bibî ameye yadkerdene û ame vatene ke ewro rojnamegerê cinîyî yê kurdî teqîbkerdoxê Denîze Firat û Gurbettellî Ersoz ê, qelem û kameraya înan destê rojnamegeran ê cinîyan de yê.

Rapor de ame parekerdene ke her ke şino vera çapemenîya azade sansur, binpaykerdişê heqan, teda, şîdet û gefê tepiştişî zêdîyenê. Rapor de derheqê binpaykerdişê heqanê rojnamegeran ê cinîyan de ca dîya nê doneyan:

''-14 rojnamegerê cinîyî maruzê şîdetî bîyî, 6 rojnamegerê cinîyî raştê gefî ameyî, erzîya keyeyê 10 rojnamegeran ê cinîyan, 26 rojnamegerê cinîyî ameyî destbendkerdene, 1 rojnamegera cinîye raştê tacîzî ameye. 31 rojnamegerê cinîyî wextê teqîbê xebere de ameyî astengkerdene, heqê seyahetî yê 1 rojnamegera cinîye ame astengkerdene. 6 rojnamegerê cinîyî ameyî tepiştene, 1 rojnamegere rê ajanîye ameye ferzkerdene, 1 rojnamegere seba ke welidîyaya karî ra ameye eştene.

-Derheqê 10 rojnamegeran ê cinîyan de tehqîqat û 12 rojnamegeran ê cinîyan de dewa ameye akerdene. 12 rojnamegeran ê cinîyan rê bi temamî cezaya zîndanî û 23 serran û 10 mengan û 27 rojan dîyaye. 4 rojnamegeran ê cinîyan rê cezaya pereyî ya 190 hezar û 250 lîra ameye dayene. 10 rojnamegerê cinîyî hema zî tepişte yê.''

Hemsereka DFGyî Dîcle Muftuoglu hêrişê vera rojnamegeran o ke Amed de wextê teqîbê xebere de qewimîya şermezar kerd. Dîcle Denîze Firat yad kerde û vat: ''Ma Denîze Firat û ê rojnamegeranê bînanê ke oxirê resnayîşê raştîyan de ameybî qetilkerdene yad kenê.''