Wekîlê DEM Partî Omer Ocalanî bi wesîleya Roşanê Remezanî 31ê adare de Rayber Apo de pêvînayiş kerdibi. Omer Ocalanî Ajansê Mezopotamya rê qalê pêvînayîşî kerd.

Omer Ocalanî da zanayene ke rewşa Rayber Apoyî hol a. Omer Ocalanî da zanayene ke Rayber Apo lîderê şarêkî yo û muxatabîya ey tena hetê kurdan ra ney hetê pêro beşan ra yena qebulkerdene.

Omer Ocalanî pare kerd ke Rayber Apoyî pêvînayîş de bale anta rêxistinîye ser. Rayber Apoyî wina vat: ‘’E şora kamca mi xo rêxistin kerd. Hema zî ez o qayde ya. Sosyalîstî yenê manaya komelkî. Ganî şima şorê her ca, şorê mîyanê şarî.’’

Omer Ocalanî da zanayene ke Rayber Apoyî pêvînayîşê 40 deqayan de Rojawan, Sûrîye, Başûr, Îran, DEM Partî ser o ercnayîşî kerdê.

Omer Ocalanî vat ke Rayber Apoyî Vengdayîşê xo yê 27ê sibate ser o nê çîyî ardê ziwanî: ‘’Şar wayîrê vengdayîşê ma vejîyayo. Ez şarî û beşdaranê Newroze selam kena.’’

Pêvînayîş de Rayber Apoyî qirkerdişê elewîyanê Sûrîye pers kerdo û wina vato: ‘’No qirkerdiş sey karê DAÎŞî yo. Ma ney qebul nêkenê. Ganî heqê elewîyan, durzîyan, nusayrîyan bipawîyê. Ganî nê şarî sey sîstemê kurdan sîstemê xo awan bikerê.’’

Rayber Apoyî pêvînayîş de ardo ziwan ke rixmo ke îqtîdar game nêerzeno o prosesî ra hêvîdar o. Rayber Apoyî vato ke ganî PKK kongreya xo de asayîşî bi xo bîyaro ca. Rayber Apoyî wina vato: ‘’Şar beno ke şikdar o la heqdar o zî. Ez qerardar a ke nê prosesî îdare bikera û heta peynî bera. Hêvîya mi zî est a û ez seba ney xebitîyena.’’

Rayber Apoyî DEM Partî ser o zî nê rexneyî kerdê: ‘’Ganî mîqtarê rayanê DEM Partî se ra 20 bibîyêne. Xebitîyayîş lazim o. Şima nêxebitîyenê. Qiseykerdişî ra zafêr xebitîyayîş lazim o. Seba şarî rêxistinkerdiş lazim o. Ganî kuçe bi kuçe, keye bi keye şar bêro rêxistinkerdene. Ez domanîya xo ra nata rêxistin bena.’’