Şaristanê Strasbourgî yê Fransa de derheqê tecrubeyanê şaredarîyanê kurdan de konferansêko mîyanneteweyî do bêro kerdene. Konferans 29ê nîsane de, Salona Konferansî ya MISHA ya Zanîngehê Strasbourgî de do bêro kerdene. Sernameyê konferansî ‘Ercnayîşê Demokrasîyê Ewropa: Kombîyayîşê Demokratîkî yê Herêmî yê Şaredarîyanê Kurdan ê Tirkîya û Newebîyayîşî (1990-2016)’ yo.

Bernameyê konferansî wina yo:

* 09.30-12.30: Roniştişê serê newebîyayîşê demokrasîyê herêmîyî. Michel Agier (EHESS), Patricia Zander û Wiebke Keim (Zanîngehê Strasbourgî) do babetanê çalakîyanê şaristanîye, demokrasîyê Ewropa biercnê. Hamit Bozarslan (EHESS) do têkilîya bi hêzanê sîyasîyan û zehmetîyan ser o qisey bikero.

* 14.00-15.30: Leyla Îmret (Cizîr), Bedîa Ozgokçe (Wan) û Osman Baydemîr (Amed) do rolê polîtîkayanê herêmîyan biercnê.

* 15.45-17.15: Fatma Şik (Sûr), Firat Anli (Amed), Abdullah Demîrbaş (Sûr) û Nejdet Atalay (Êlih) do rayîr û metodanê demokrasîyî biercnê. Fleur Laronze (Zanîngehê Strasbourgî) do moderatorîye bikera.

* 17.30-17.45: Roniştişo peyên