Endamê Konseya Dewlete ya Swîsre Sanator Carlo Sommarugayî derheqê Vengdayîşê Haştîye û Komelê Demokratîkî yê Rayber Apoyî û mesuldarîya komelê mîyanneteweyîyî de cewab da persanê ANFyî.

Senator Sommarugayî dîyar kerd ke verê vengdayîşê Rayber Apoyî de ê mat mendê û vat: ‘’La ewro ma pê bawer ê ke çîyo ke ey kerdo raşt o. Seba çareserîya krîzan û qedînayîşê şîdetê vera kurdan no vengdayîş girîng o. No vengdayîş eşkeno verê prosesêkê haştîye, entegrasyonê komelkî û dezgehanê demokratîkan abikero. La hema zî Erdoganî û hukmatê ci seba caardişê haştîya Tirkîya û destpêkerdişê prosesî no firsend nêşuxilnayo.

Seba serkewtişê nê prosesî ganî hêverî adirbirnayîşêko mende bêro kerdene û dima dîyalogî bidê destpêkerdene. Tirkîya seba adirbirnayîşî ganî PKK de, selahîyetdaranê sîyasîyan de pêvînayîş bikera û welatêkê teberî ra meymandarîye biwaza.’’

Senatorî persê ‘Gelo Swîsre eşkena mabênê wird terefan de rolê mabênçîtîye bikera?’ ser o vat: ‘’Xora eşkena. Swîsre seba pêvînayîşanê nimiteyan û aramîyan wayîra cayanê munasîban a. Ancî Swîsre eşkena kesayetan wezîfedar bikera ke pêvînayîşan asayî bikera. Goreyê min hemkarê Tirkîya yê ke mîyanê NATOyî de cagênê eşkenê seba çareserîye mesuldarîye bigêrê.’’

Senator Sommarugayî pare kerd ke azadîya Rayber Apoyî zaf girîng a û vat: ‘’Veradîyayîşê Mandelayî verê prosesê haştîye akerdibî. Sey Mandelayî Ocalan zî mîyanê kurdan de figurêko tarîxî yo. Coka veradîyayîşê ey do bibo mesajêko xurt. Azadîya Ocalanî hem seba îqtîdarê Tirkîya hem zî seba Serekkomarî do biba gamêka samîmîyetî ya verêne û îsbat bikero ke ê haştîye de isrardar ê. ‘’