Ganî merdim bikewo rayîr û eke wextê ci ameyo nêvindero. Nêke çîyo rûtîn cara beno sey mergî. Eke rayîr esto ganî merdim tede şoro; bi çêrî û eşqî...Raştîye şerwananê azadîye heman rayîrî de resnena pê. Hîkayeyî raywanan kenê yew.

Nê hîkayeyan ra yew zî hîkayeya gerîla Jîyan a. Jîyane qezaya Nisêbînî ya Mêrdînî de dadîya xo ra bena û pê ruhê xoverdayîşê Nisêbînî bena pîl. Wexto ke Jîyane bena pîl hêrişê dişmenî yê vera Kurdîstanî zî zêdîyenê. Jîyane bêqesawet kewena rayîr û peynîya 1991î de bena gerîla.

Serra 1997î de hînî xeyalê aye yo tewr pîl vînayîşê Rayber Apoyî yo. La dişmen pê dafika namerde nê xeyalî tira gêno û Jîyane bena şehîd.

Jîyane rayîr a manena la embazê ci seba xeyalê aye rayîr a şinê.

Serran ra pey waya Jîyane pê hîkayeyanê waka xo bena pîl. Aye tewr waka xo nêdîyaya ka seke aye şinasnena wazena tede biciwîya. Dadîya Jîyane bi heyranîya gerîlayan şexsê Jîyane de pêro gerîlayan zerrîya xo de kena we.

Kurdîstan de heta ke şehîd nêbê nameyê gerîlayan nêdîyenê domanan. Dadîya Jîyane 1997 de torna xo rê nameyê Jîyane nana pa. Her kes pê şaş maneno. Çunke hema çewî nêzanayêne ke Jîyane şehîd bîya la dadîya ci hîs kerdêne.

2006 de waya Jîyane bena pîl û seyci kewena rayîr. Wextêk mîyanê gerîlayan de nameyê ci bena Pelşine. Pelşina ke nêzanayêne waka ci şehîd bîya, tim hêvî kena ke rojêke binê kilêkî de yan zî binê darêke de raştê waka xo bêra.

Pelşine tim merasîman de peynî de pawena. Embazê ci meraq kenê persenê 'Gelo çi pawena.' A zî vana ''Eke rojêke embaze Jîyane zî mîyanê embazan de bêra, ez mirdîya xo verar şina ci. Coka pawena.''

Embazî binê tesîrê nê qiseyan de manenê û ci rê hînî vanê ke waka ci şehîd bîya. Pelşine bire dana ke hînî rayîrê waka xo ser ra şora. Wextêkî ra pey waştişê embazan ser o Pelşine nameyê waka xo gêna û bena Jîyane. Çunke êyê ke kewenê rayîrî zêdîyenê.