Endama Konseya Pêroyî ya KBDHyî û Temsîlkara MLKP/KKO Hîvrone Razmûhî venga pêro cinîyan da ke tewrê Şorişê Rojawanî bibê.

Razmûhîye bi wesîleya 25ê Teşrîna Peyêne ya Roja Têkoşînê Vera Şîdetê Cinîyan beyanatêk da. Razmûhîye pare kerd ke Salava ra heta Arîne, Sarya, Avaşîne, Raperîne, Destane, Cerene Guneş, Aynûre Ada tarîxêkê xoverdayîşî esto û bale ante nê çi ser ke ê do heta peynî Şorişê Cinîyan ê Rojawanî bipawê. Razmûhîye vat: "Erdo ke ame îşxalkerdene erdê ma yo, no şorişo ke wazenê bifetisnê şorişê ma yo. Naye ra ma do destûr nêdê nê hêrişan. Ma do bi qerardarîye  çalakîyanê şorişê cinîyan ê Rojawanî, îradeyê ci yê şerî xo rê rayber bikê û ma do vera sîstemê kapîtalîst şer bikê. Çunke şorişê Rojawanî şorişê vera pederşahîye yo. Ewro cinîyê bindestî verê xo danê Şorişê Cinîyan ê Rojawanî û tira îlham gênê.

Ganî şarê Rojawanî, yar û neyarî bizanê ke  tecrubeyê ma zaf ê. Êyê ke Tirkîya ra bire û ferman gênê dostê Rojawanî nîyê. Zûrê înan deşîfre bîyî. Ê hemkarê kiştoxê şarê ma yê.  Şorişgêr û komunîstê cinîyî do xo ver bidê. Ma do îşxalkeran çin bikê."