Kongreya Starî bi şîarê ''Bi ruhê têkoşînê Şorişê Cinîyan ma serewedaritişê jin, jiyan azadî biresnê serfîrazîye' kongreya xo ya 9. kerde. Temsîlkarê partîyan û têgêrayîşanê bînan zî tewrê kongre bîyî.

Beşdaranê kongre ra Endama Koordînasyonê Kongreya Starî Rihane Loqo ANFyî rê qisey kerd.

Rihane Loqo pare kerd ke înan rojêka tarîxîye de kongreyêka tarîxîye kerde û vat: ''Ma kongreya xo bi felsefeya 'jin, jiyan, azadî' ya Rayber Apoyî kerde.Seba ke Rojawan de xebat, rêxistînî û perwerdeyê cinîyan bêrê averkerdene ma bi coşî kongre temam kerde. Cinîyê, ereb, kurd, sûryan, tirkmen, çerkez û êzidîyî tewrê kongre bîyî. Reyna şaristananê Sûrîye, Başûrê Kurdîstanî û Ewropa ra zî xeylêk cinîyî beşdarê kongre bîyî. Ma waşt ke na kongre de mesajê paştdayîşî bidê serewedaritişê cinîyanê Rojhelatê Kurdîstanî zî. Ma kongre de nê serewedaritişî ser o ercnayîş û qiseykerdişî zî kerdî.

Ganî ma her cayê Kurdîstanî de serkêşîya cinîyan bi bivurnê têgêrayîşê cinîyan. Senî ke ma sey cinîyan ê kurdan yewîya şaran awan kerde ganî cinîyê erebî zî serkêşîya pêro cinîyan ê ereban û cinîyan ê bînan bikerê. Ganî cinîyê sûryanî zî bibê serkêşê pêro cinîyan. KJKyî zî seba kongreya ma mesajêk şawit. Mesajê KJKyî seba awankerdiş û destkewteyan mesajêko girîng bi. Ma wazenê ê zî na kongre de cabigêrê. Na hesreta ma ya tewr pîl a. Rêxistin û dezgehanê bînan zî ma rê mesajî şawitî. Her kesî mesajanê xo de serkewtiş ma rê waşt.''