3ê tebaxa 2014î de DAÎŞî hêrişê Şingalî kerdbî û êzidîyan rê fermanêko newe ferz kerdbî. DAÎŞî bi desan cinîyî kerdbî kole, carîye û kiştî. Hema zî aqîbetê tay cinîyan ê êzidîyanê ke destê DAÎŞî de bîyî nêzanîyeno.

Nûhate ê cinîyan ra yew a ke şerê estbîyayîşî de serkêşîye kerde. A wazena rêçanê fermanî werte ra wedarna, raştîya xo û cinîyan dinya rê vaja.

Nûhate wazena serê Koyê Şingalî de qala hîkayeya xo bikera.

Nûhate wina dest pêkena: ''Ez Nûhat a. 2000 de bajarekê Borikî yê Şingalî de mîyanê keyeyêkê êzidîyî de dadîye ra bîya. Ma eşîra Qirmata ra yê û herêma Serhedî ya Vakurê Kurdîstanî ra koçê tîya bîyê. Ma fermanî ra koç kerdo. Ma ameyî tîya de mîyanê koyan de xo nimit. Çunke ma tim raştê fermanan ameyêne. Kal û pîranê ma tim cinîyî nimitêne ke wa wayîrê fermanan pê ma nêhesîyê. Wina wina mîyanê komelê ma de zî cinîyî bîyî qels. Komelê ma de vateyê camêrdan derbazdar bîyêne. Domanîya mi de keyeyê mi fikrê Rayber Apoyî şinasnayî. Mi zî waşt ez nasnameyê xo bizana.

Ez kurdayetîye, êzdatîye nêzdî ra musaya, mi zana ke Kurdîstan bîyo çar parçe. Tay êzidîyan nasnameyê kurdayetî û ezdatîye cîya qebul kerdî. Ez înan fam kena la no raşt nîyo. Dişmenî ma parçe kerdo. Ez doman bîya mi kitabê Rayberîye wendêne. Komelê ma de domanê kênayî qij hesibîyenê. Keyeyê mi zî bi çimêkê ecêbî ewnîyayêne mi ra. Têna dadîya mi wina nêbîyêne. Mîyanê keyeyî de dadîya mi terefgîra PKKyî babîyê mi terefgîrê PDKyî bibi. Dadîya mi fikrê Apogîran musnayî mi.Kekê mi zî dadîya mi ra nînan musa û tewrê xebatan bi.

Mi têna 3 serrî perwerde dî. Wexto ke ma keyeyê xo verd Solak uca de birayê mi bi herfanê latînî wendiş û nuştiş musna ma. 2013 de derheqê Rayber Apoyî de kovarêke resaye destê mi. Reya verêne bi hîra mi fikrê Rayber Apoyî wendî. Newroza 2013î de Amed de wexto ke mektuba Rayberîye ameye wendene zaf keyfê dadîya mi ameya. Mi mîyanê fistanê xo de şekerî cîranan rê vila kerdî. Înan vatêne 'se bîyo. Mijdanîye çita ya?' Mi vatêne 'Rayber Apo do vera bidîyo.'

Ma 2013 de reyna agêra Borik...''

Do dewam bikero...