Efrîn, Kobanê, Til Temir û Hesekê de cinîyî seba 25ê Teşrîna Peyêne Roja Têkoşînê Vera Şîdetê Serê Cinîyan vejîyayî meydanan. Çalakîyan de hêrişê îşxalî yê dewleta tirke zî ameyî şermezarkerdene.

Kobanê de cinîyan ver bi Meydanê Jina Azade mîtîngêk kerd. Endama Koordînasyonê Kongreya Starî yê Herêma Firatî Mizgîne Xelîl îfade kerd ke cinîyî bi sloganê 'jin, jiyan, azadî' sere wedarito û vat: ''Dişmen xîret keno ke cinîya azade çin bikero, xîret keno ke şorişê Rojawanî çin bikero. La ma wayîrê xoverdayîşî yê.''

Efrîn de Kongreya Starî bi wesîleya 25ê Teşrîna Peyêne Kampa Serdemî ya Şehba de rayraşîyayîşêk kerd. Dima rayraşîyayîş vurîya mîtîngî. Mîtîng de Endama Îdareyê Kongreya Starî Elîfe Mihemed qisey kerd û xoverdayîşê cinîyan ê vera îşxalê dewleta tirke selam kerd. Endama Kongreya Starî ya Efrînî Menale Şêxo zî Şorişê Rojawanî û Şorişê Rojhelatê Kurdîstanî selam kerd û îfade kerd ke îradeyê cinîyan ê azadan yeno hedefkerdene.

Hesekê de cinîyî bi sloganê "Jiyan Jiyan Azadî" rayîr a şîyî. Rayraşîyayîş Çerxerêya Agirkûjiyê de vurîya mîtîngêk. Endama Kongreya Starî Welîda Bûtî mîtîng de pare kerd ke dewleta tirke armanc kena ke îrade û şorişê cinîyan çib bikera. Çalakîye bi sloganan qedîyaye.

Qezaya Til Temirî ya Kantonê Hesekê de çalakîyêke ameye kerdene. Çalakîye de alayê Kongreya Starî û fotografê şehîdan ameyî akerdene. Dima eşkerayîyêke ameye dayene. Eşkerayîye de ame vatene ke dewleta tirke pê hêrişanê xo wazena îrade û hêzê cinîyan çin bikera.