8ê hezîrane de Amed de 20 rojnamegerî ameybî destbendkerdene û 16 hezîrane de zî nînan ra 16 rojnamegerî ameyî tepiştene. Rojnamegeranê cinîyan ê tepişteyan Mudira Jinnewsî Safîye Alagaş, Neşe Toprak, Elîfe Ungur û Remzîye Temek Zîndanê Amedî ra mesajî şawitî.

Safîye Alagaş mesajê xo de wina vat: ''Hêrişê vera ajansê ma derbazê safhayêka newîye bîyê û no mojneno ke dewleta tirke hêzê cinîyan ra çendek tersena. Sebebo verên ê tedaya serê Jinnewsî no yo ke vengê cinîyan, domanan û şaranê bindestan resnayêne. Kamca de zulm est bo cinîyî vejîyenê kuçeyan û xîret kenê ke vengê xo biresnê pêro dinya. Ma pê bawer ê ke pawitiş û wayîrvejîyayîşê rojnamegerîye do bizêdîyê. Bi hêvîya ê rojan ke ez do newe ra pa embazanê xo bikewa peyê xeberan...''

Mesajê Neşe Toprak wina yo: ''Ganî teber de paştdayîşê bi rojnamegeran dewam bikero. Ma nika zere de kitabî wanenê, resim virazenê. Labelê selahîyetdarê zîndanî qelemê boyaxkerdişî nêdanê ma. Labelê çîyêk nêeşkeno ma asteng bikero. Ma do her şert û mercî de hem binusê hem zî xêze bikerê.''

Remzîye Temel vat: ''Moral û motîvasyonê ma ca de yo. Ma zanenê ke ma heqdar ê. Ma têna embazanê xo meraq kenê. Ganî her şert û mercî de ma xebatanê xo rê dewam bikerê.''

Elîfe Ungur vat: ''Ma zanenê ke paştdayîş ma keno pîlêr. Ma kesanê ke mîyanê paştdayîşî de yê rê sipas kenê.''