Endama Konseya Rayberdişî ya KJKyî Zerîne Rûken derheqê qirkerdişê cinîyan ê Îranî de ANFyî rê qisey kerd.

Qiseykerdişê Rûkene ra tay noqtayê girîngî wina yê:

''Şorişê Cinîyan o ke serkêşîya Rayber Apoyî de ame afernayene bi perspektîf û polîtîkayê ci hînî nênê înkarkerdene. Sebebanê qirkerdişê cinîyan ra yew zî astengkerdişê şorişê cinîyan o. Îran û Rojhelatê Kurdîstanî de têkoşînê cinîyan dîyarker o. Ma eşkenê bi asanî vajê ke şert û merc, îmkanî seba şorişê cinîyan musbet ê. Îran û Rojhelatê Kurdîstanî de bê şorişê cinîyan mumkîn nîyo ke mezg, îdeolojî û pênaseyê camêrdî bivurîyê û wedarîyê. Rejîmê Îranî seba je têkoşînê cinîyan çin bikerê şero taybet visto dewre. La Îran û Rojhelatê Kurdîstanî de pawitişê îdeolojîkî, her wextî ra zêdeyêr hewceyê tewir û rêxistinîya cinîyan a bi perspektîfê şorişê cinîyan ê.

Sey cinîyanê kurd, fars, belûc, ereb û azerîyan ganî ma rêxistinîya xo, xopawitiş û têkoşînê xo xurt bikerê, hemleyanê şorişgêran bierzê. Wext wextê ci yo ke bi paştdayîşê cinîyan ma aver şorê, rêxistinîya xo hempar bikerê. Her çî ra verî ganî ma hetê mezg, hişmendî û îradeyî ra xo aver berê. Rojhelatê Kurdîstanî de û Îran de cinîyan vera qirkerdişê Jîna Emînî sloganê 'Cinîye, Cuye, Azadîye' berz kerd û dersêka pîke daye dewleta kolonyalîste. Ganî şarê Îranî dormeyê nê sloganî de waştiş û çareserîyan biafernê û çalakîyanê xo pîlêr bikerê.

Qetilkerdişê Jîna Emînî ganî seba cinîyanê Rojhelatê Kurdîstanî bibo sebebê şorişî. Cinîyan vera qirkerdişî bi heybetînî meydanan de tewirê xo mojna. Rejîmê Îranî wazeno bi hêrişan komelî teslîm bigêro. Şarê Îran û Rojhelatê Kurdîstanî seba Jîna bîyê yew. No hêrsê şarî do azadîye bîyaro.  Ma tewirê esîlî yê şarê ma yê Merîwan, Sîne, Meşet, Seqiz selam kenê. Îran de heta ke azadîya cinîyan nêra caardene garantîya çîyêkî çin a. Sey mîlyonan cinîyan ma do hesabê Jîna bipersê, nê sîstemê camêrdan birijnê. Wa cinîyê Rojhelatê Kurdîstanî wirzê payan ser û seba hesabpersayîşî têkoşînî pîl bikerê.

Têkoşînê cinîyan ê Rojhelat û Îranî ewro resayo astêka xurte. Cinîyî her ca de serkêşîya têkoşîn û xoverdayîşî kenê. Sîstemêko newe do serkêkîya cinîyan de zîl bido. Vera rejîmê Îranî yê dişmenê cinîyan, vera mezgê serdestîya camêrdan ewro şarê ma yê Rojhelat û Îranî serewedaritiş de yê. Azadîye do bi hêzê rêxistinî ya cinîyan bêra Îranî. Cinîyî do azadîye bîyarê Îran û Rojhelatê Kurdîstanî.''