Şaristanê Lozanî yê Swîsre de Merkezê Jineolojî yê Brukselî û Meclîsê Cinîyan ê Kurdan ê Lajîne yê Vaudî di rojan semînerê Jineolojî da. Roja verêne de xebata kargehî, roja diyîne de zî tarîxê şarê kurdî û cinîyan ê kurdan ser o pêşkêşêk ame kerdene.

Koordînatora semînetî û aktîvîsta Merkezê Jineolojî yê Brukselî Sarahe Marcha derheqê semînerî de ANFyî rê qisey kerd.

Sarahe da zanayene ke roja yewine de 15, roja diyîne de 20 kesî tewrê semînerî bîyî û vat: ''Cinîyê enternasyonel, koçber û swîsreyîjî zî tewrê semînerî bîyî. Ma cîya biasê zî têkoşînê ma yew o, ma heman noqta de yenê yewca. Seba ke ma têkoşînê cinîyan fam bikerê tarîxê ci ganî bizanê. Coka ma giranîye daye semînerê tarîxî ser. Têkoşînê cinîyan Mezopotamya ra vilayê dinya bi. Ma reyna azadîye û girîngîya ci ser o nîqaş kerd. Reyna ma semîner de heqê mendişî, ekofemînîzm, afrofemînîzm, têkoşînê dekolonyalî, nîjadprestî û şîdetê polîsan ûsn. ser o nîqaşî kerdî. Zaf eleqe ame mojnayene Jineolojî. Ma di hewte ra pey zî Rennesê Fransa de semîner do bidê.''

Semîner de qiseykerdişê Aysele Dogan o ke merasîmê yadkerdişê Sakîne Cansiz de kerdbi ame mojnayene.