Wekîla HDPyî ya Amedî 1ê adare de heqê ci yê destpanêdayîşî amebi wedaritene û 2ê êlule de zî Îstanbul de amebî destbendkerdene. Xeylêk şaristanan de pey ra kelemçekerdişî û ferzkerdişê şîdetê 'serewarardişî' yê vera Wekîla HDPyî Semra Guzel ame protestokerdene.

Îstanbul

Binê ablûqaya polîsan de Wekîlê HDPyî Musa Pîroglu, Garo Paylan û Alî Kenanoglu, Mayê Haştîye û rêxistinê cinîyan tewrê çalakîye bîyî. Çalakîye de pankarta 'Semra Guzel îradeyê ma ya, destê xo medê îradeyê ma' ameye kiriştene û sloganê sey 'Semra Guzel rûmetê şarî ya' ameyî vatene.

Hemsereka HDPyî ya Îstanbulî Îlknure Bîrol îfade kerd ke Semra Guzel îradeyê şarê kurdî ya û seba ke haştîye pawena a raştê nê hêrişan yena. Bîrole vat: ''Şima nêeşkenê pê ziwanê propaganda û xeberanê servîskerdeyan nê şarî bin bikerê. HDP aktorêko sîyasî yo winasên nîyo ke şima pê kumpan, senaryo û lapatan bin bikerê. Ma do hesabanê şima yê faşîstan bin bikerê.''

Wekîlê HDPyî Alî Kenanogluyî zî dîyar kerd ke Semra Guzel qetî sereyê xo nêardo war û do nêara û vat: ''Senarîstê nê fîlmî wa bizanê ke sîyasetmedarê HDPyî pê rûmetê xo ciwîyenê. Seba ke ê hê şinê û HDPyî şîyayîşê înan garantî kerdo ê hêrişê HDPyî kenê. La ma zî do têkoşînê xo bi rêxistinî bbikerê û şima bişawê mîyanê çopan.''

Amed

Platformê Cinîyan ê Amedî yê Dîcle (DAKAP) serkêşîya rêxistinanê sivîlan û partîyan de seba Guzele Parka Rojava de eşkerayîyêke daye.  Aktîvîstê Têgêrayîşê Cinîyan ê Azadan (TJA), Vervatoxa Meclîsê Cinîyan ê HDPyî Ayşe Acar Başaran, Wekîla HDPyî ya Amedî Remzîye Tosun zî tewra eşkerayîye bîyî.

Vervatoxa DAKAPî Kiymete Yildiz eşkerayîye de pare kerd ke cinîyê kurdî yê sey Semra Guzel, Aysele Tugluk, Sevîle Rojbîn Çetîn, Ayşe Gokhan û Leyla Guven tim raştê teda û hêrişan yenê.

Vervatoxa Meclîsê Cinîyan ê HDPyî Başarane vera Guzele kampanyaya lînçî serkêşîya îqtîdarî de yena kerdene û vat: ''Wezîrê Karanê Zereyî yo ke lîderê sûcan o, partîya ma keno hedef. Ganî no wezîr bêro tepiştene. Ma do nê îqtîdarî ra hesab bipersê. Şarê kurdî û cinîyan ê kurdan vizêr sereyê xo nêard war û ê do nêarê war.''

Riha

Rêxistina HDPyî ya Riha de bi beşdarîya Wekîlanê HDPyî Ayşe Surucu û Omer Ocalanî, Mayanê Haştîye û rêxistinanê komelê sivîlî seba Guzele çalakîyêke ameye kerdene. Wekîle Ayşe Surucu eşkerayîye de vat ke Semra Guzel îradeyê cinîyan a û cinîyî pê aye sereberz ê.

Agirî

Rêxistina HDPyî ya Agirî de pankarta 'Destê xo medê wekîla ma' ameye akerdene. Îdarekarê Rêxistina HDPyî Suat Yîgîtî çalakîye de da zanayene ke dewlete verî zî kerd ke Seyîd Riza û Şêx Seîd sereyê xo bîyarê war. La qet yew kurdî/e heta nika sereyê xo nêardo war.

Çanakkale

Rêxistina HDPyî ya Çanakkale kombîyayîşê çapemenîye kerd. Meclîsê Cinîyan ê HDPyî Gonule Baklaci çalakîye de qisey kerd û vat: ''Îqtîdar mafyayan de fotografan gêno la wekîla ma raştê tedayan yena. Ma do ver zulmî sereyê xo nêarê war û heta peynî wayîrê îradeyê xo vejîyê.''