Meclîsê Cinîyan ê HDP û Têgêrayîşê Cinîyan ê Kurdan (TJA) xespkerdişê destnêpanayîşê Wekîle Semra Guzel xeylêk bajaran de şermezar kerd.

Îstanbul de verê Rêxistina HDPyî de eşkerayîye ameye dayene. Wekîla HDPyî ya Îstanbulî Zuleyha Gulum vat: ''Mesele têna wedaritişê destnêpanayîşê Semra Guzel nîyo, no vera partîya ma , şarê kurdî yew hêriş o. Qetilkerdişê Denîze Poyraz û waştişê wedaritişê wekîlîya Guzele pabesteyê yewbînanê. Ma naye zaf hole zanê ke îqtîdar têkoşînê cinîyan ê kurdan ra terseno. Têkoşînê HDPyî ra tersenê. Zanê ke hinî vînî kenê, coka hêrişê xo zêdînayî.''

Vervatoxa Meclîsê Cinîyan ê Îstanbulî Dîleke Ozer zî vat: ''Guzele vengê cinîyan a. Êyê ke pê polîtîkayanê îqtîdarî benê şay wa bizanê ke ewro çîyo ke Semra rê beno siba do bêro şima ser. Ma tîya ra veng danê Semra Guzel îradeyê ma ya, vengê cinîyan û ciwanan a.  Ma veng danê heme cinîyanê têkoşeran, pawitişê Semra pawitişê sîyasetkerdişê cinîyan o. No hêrişo ke vera îradeyê şaran û cinîyan yeno kerdene do meeşko verê têkoşînê ma bigêro.''

Reyna Şirnex, Rija, Meletî, Mêrdîn, Adana, Hatay û xeylêk bajaranê bînan de zî cinîyan bi çalakîyan paştî daye Semra Guzel û polîtîkayê hêrişkarî yê vera kurdan û cinîyan şermezar kerdî.