Endama PAJKî Ronahî Serhat serebûtê peyênî yê Rojhelatê Kurdîstanî û Îranî ANFyî rê ercnayî.

Qiseykerdişê Serhatî bi kilmî wina yo:

Dinya de şîdetê vera cinîyan zêdîyeno. Qetilkerdişê Jîna Emînî û Şilêre Resûlî mîsalê ney ê peyênî yê. Cenaba to na babete senî ercnena, mabênê sîstem û şîdetê vera cinîyan de têkilîyêka senîne est a?

Rayber Apoyî îfade kerdbi ke rixmê tarîtî û şîdetî zî seserra 21. seserra cinîyan a û paradîgmaya azadîya cinîyan aver berde. Verî ez Rayber Apoyî selam kena. Azadîya cinîyan pabesteyê azadîya Rayber Apoyî yo. Qirkerdişê cinîyan qirkerdişê komelî yo. Qirkerdişê cinîyan hetê dewletanê neteweyan ra bi metodanê ekonomîk, polîtîk, kulturel, medyatîk û milîtarîstan yeno kerdene. Sîstemo nikayên azadîya cinîyan ra terseno çunke azadîya cinîyan do heqanê bingeyînan bivisna destî. Coka no sîstemê serdestîya camêrdan pê şîdet û qirkerdişî keno ke verê serewedaritişê cinîyan bigêro. Coka sloganê 'Cînayetê cinîyan polîtîk ê' raşt o. Sîstem cinîyan rê fuhuş, tecawuz, tacîz û qirkerdişî ferz keno. Bi taybetî Rojhelatê Mîyanênî de sere de cinîyê kurdî, pêro cinîyî benê hedefê sîstemî. Cinîyê ke vengê medenîyetê demokratîkî yê, na seserre de hînî bi çêrî vera sîstemê dînperest, mîlîtarîst û seksîstî wurzenê we. Nika cinîyî serkêşê vurîyayîşan ê, mujdeyê demokrasî û hêvî yê.

Cinîya kurde Jîna Emînîya 22 serre 14ê êlule de bi bahaneya ke 'gijikê ci aseno' hetê polîsanê exlaqî ra ameye destbendkerdene, îşkence dî û 19ê êlule de dinyaya xo bedilnaye. Nê mîsalî ser o ma vajê gelo çimeyê na tedaya rejîmê Îranî ya vera cinîyan û komelî çita yo?

Çalakîyê vera qetilkerdişê Jîna ganî têna Rojhelat û Îranî de sînordar nêmanê, pêro dinya rê vila bibê. Rejîmê Îranî yo ke binî ra antîdemokratîk o, vera azadîya cinîyan o, rejîmo tewr seksîst, barbar o. Rejîmê Îranî hînî nêno islahkerdene coka ganî binî ra wedarîyo. Ganî hînî demokrasî bêra Îranî. Komelî ganî bi xo qerar bidê ke senî biciwîyê. Komelê Îranî eke rejîmê Îranî birijnê, kurdan rê xoserîye bidê eşkenê cuya azade awan bikerê. Îqtîdar hînî nêeşkeno şaranê Îranî bixapîno. Sere de cinî û ciwanî komelê Îranî demokrasî û azadîye wazenê. Coka hêrsê vera qetilkerdişê Jîna hende lez vila bîyo.

Qetilkerdişê Jîna Emînî ra dima şarê Îranî û Rojhelatê Kurdîstanî, dima zî şarê çar parçeyanê Kurdîstanî û dinya vejîyayî waran û înan sloganê sey 'Cinîye, Cuye, Azadîye' û 'Dîktatorîye rê Merg' vatî. Cenaba to wazena nê girseyan rê çi vaja?

Oyo esas no yo ke sere de Tehran, Meşhed, Rasht, Paveh, Bane, Bokan, Kamyaran, Dehgolan, sinê, Saqiz, Gîlan, Şîno û Kirmaşan, Ûrmiye, Mahabad, Bîcar, Dîwandere, Îsfahan, Pîranşar, Nexed de xeylêk cayan de şar bi yew û tewirêko exlaqî-polîtîk mojna. Ganî dinya nê tewirî ra dersa xo bigêra. Nê girseyan pîya sloganê 'Cinîye, Cuye, Azadîye' vat ke no mojneno ke şar hişyar beno. No slogano ke Rayber Apoyî verî vatbi, hînî bîyo global. Kesê ke nê çalakîyan de dinyaya xo bedilnayê, şehîdê demokrasî yê. Serkêşîya cinîyan de vera şîdetî tewirêko komelkî yeno  mojnayene. No têgêrayîşê şarî yo û binî ra rejîmê Îranî ser o persan perseno. Şorişo komelkî no yo.

Cinîyan bi xurtî serkêşîya nawnayîşan kerde. Cinîyî bi hêrsî vera rejîmî vejîyayî meydanan. Sere de cinîyanê Rojhelatê Kurdîstanî rê, nê cinîyan rê yew mesajê şima est o?

Eke Rojhelatê Kurdîstanî û Îran de xoverdayîş dewam bikero û verê vurîyayîşê sîyasîyî abibo dewrêko newe do dest pêbikero. Her xoverdayîş yew vîr û kulturî awan keno, ma hîna nêzdîyê azadîye keno.Wextê ci ameyo ke Îran û Rojhelat de cinîyî roşanê xo fîraz bikerê. Koletîye ra ber çîyêk çin o ke cinîyî do vînî bikerê. Xoverdayîşê cinîyanê Îranî û Rojhelatê Kurdîstanî moral û qewet danê cinîyanê dinya. Erkê ma yo ke ma her warî de vengê xo berz bikerê û paştî bidê nê xoverdayîşê cinîyan.

Rewşa Îranî reyde Rojawan û Sûrîye de zî  gef û hêrişanê DAÎŞî reyde, hêrişê îşxalî yê dewleta tirke zî dewam kenê. Vera nê hêrişan xoverdayîş est o. Manaya nê xoverdayîşî û têkoşînê azadîya cinîyan çita ya?

DAÎŞo ke cinîyî sey koleyan rotêne, qetil kerdêne xêrê xoverdayîşê şerwananê Rojawanî ra ame binvistene. La tehlukeyê DAÎŞî dewam keno. Pêro dinya zaneno ke Erdogan DAÎŞî weye keno. Cinîyan o çax zî serkêşîya têkoşînê vera DAÎŞî kerdbî û nê têkoşînî Şorişê Rojawanî û cinîyan xurt kerdbi. Erdogan wazeno şorişê cinîyan bifatisno, şorişî çin bikero. Welatê Ewropa û dinya zî seba menfaatanê xo verê hêrişanê dewleta tirke akenê. PAwitişê Rojawanî pawitişê azadîya cinîyan û merdimîye yo. Xeta AKPyî xeta nazîyan a. Erdogan Hîtlerê Rojhelatê Mîyanênî yo. Vera hêrişanê îşxalî yê serê Erdoganî ganî xopawitişo hempar ê şaranê ma yê kurd-ereb-armenî-sûryanîyan bêro afernayene û serê nê bingeyî de Şerê Şarî yo Şorişgêr bêro kerdene. Erdogan û AKP-MHP NATO û Amerîka ra paştî gênê û kurdan rê qirkerdişî ferz kenê. Ganî dewletê mîyanneteweyî paştdayîşê Erdoganî ra fek vera bidê, çarçewa çareserîya meseleya kurdan de heqanê kurdan bişinasnê.''