Prof. Dr. İzzettin Onder ke pîsporanê îktîsatê marksîstî ra yew o, derheqê prosesê neweyî de ANFyî rê erjnayîşî kerdî.

İzzettin Onderî  nê vatî: ''Na mesele bi serran o yena îxmalkerdene û redkerdene. Bi sîstemê netewe-dewlete dostîya mabênê şaran helîyaye. Wird hetan zî dejê giranî antî û na mesele heta rojanê ma ameyî. Ez teqdîr kena ke na mesele semedê çareserkerdişî ameye destgirewtene. Gerek wird hetî zî gamê ke hewce kenê bierzê ke destkewteyê muhîmî bêrê destfînayene. Semedê serkewtişê prosesî gerek tay şertî bêrê caardene.

Xeylê reyî  çareserkerdişê na mesele ame ceribnayene la peynîya ci panêameye. Nar ey seba ke netîceyo mende bêro girewtene gerek şertê ci bêrê caardene. Seba ke no proses ser bikewo gerek wird hetî yewbînan mexapînê û binê tesîr û zextê emperyalîstan de memanê. Ma hêvî kenê ke na rey şertê yewca de ciwîyayîşî bêrê caardene. Bi qala kilmê çareserîya na mesele ya ke bîye sebebê dejanê giranan, pabesteyê nîyet û cehdkerdişanê samîmîyan ê wird hetan o.''