Sîyasetmedaranê cinîyan ê Swêdî vera hêrişanê dewleta tirke yê serê Kurdîstanî nêrazîbîyayîşê xo mojna û îfade kerd ke dewleta tirke seba ke PKK lîsteya terorî de ca gêno ney ra hêzî gêna û hêrişê vera kurdan zêdînena.

Endama Partîya Çepe ya Konseya Uppsala Hanna Viktoria Morc vat: ''Tirkîya vera kurdanê Iraqî hêrişanê kîmyewîyan kena ke no vera qanûnan o û binpaykerdişê heqanê merdiman o. Şarê kurdî vera DAÎŞî şer keno. Ganî Tirkîya hînî welatanê xo yê cîranan îşxal nêkera.''

Endama Partîya Çepe ya Konseya Ewropa Maline Bjork vat: ''Rejîmê Erdoganî vera herêma kurdan hêrişê emperyalîstî kena. Hêrişê Erdoganî herême visnenê binê tehlukeyî. Meseleyî wina çareser nêbenê. Ganî dewleta tirke û PKK dormeyê masayêke de çareserîye bivînê. Ganî ma şerê Erdoganî vindarnê.'' 

Wekîla Partîya Çepe Ilona Szatmari Waldau vat: ''Tirkîya hêrişê kurdanê Iraqî kena. Dinya vera hêrişanê Tirkîya bêveng a. Ez venga hukmatî dana ke wa derheqê nê hêrişan de Tirkîya reyde ronişê. Ganî ma hêrişê Tirkîya yê vera kurdan û PKKyî vindarnê.''

Wekîla Partîya Çepe Lorena Delgado Varas vat: ''Endama NATOyî Tirkîya hêrişê vakurê Iraqî kena û bi nê hawayî qanûnan binpay kena. Ma hêrişanê Tirkîya yê vera kurdan şermezar kenê. Wexto ke DAÎŞî hêriş kerd şarê kurdî verê ney girewt û Ewropa pawite. Nika zî ganî dinya seba kurdan heman çi bikera. Ez venga hukmatê Swêdî dana ke ganî nê warî de têbigêro.''

Berpirsa Têkilîyanê Mîyanneteweyîyan a Partîya Çepe Martha Aguirre vat: ''Raporê serê hêrişanê kîmyewîyan ê Tirkîya mojnenê ke vera gerîlayanê PKKyî çeka kîmyewîye şuxilîyena. Şuxilnayîşê çeka kîmyewîye sûc o û huqûqê mîyanneteweyî binpay keno. Ma zanenê ke seba ke PKK lîsteya terorî de yo Tirkîya bombardumanê vera kurdan kena meşrû. Naye ra ganî 'lîsteya terorî' ra bêro vetene.''

Endama Parlamentoyê Herêma Orebroyî Jessica Carlqvist vat: ''Erdoganî vera kurdan qirkerdişêkê etnîkî keno. 200 hezar kesî neçare mendî ke şerê Tirkîya ra biremê. Erdogan ambulans û nêweşxaneyan zî dano bombayan ver. Ez bombardumanê vera kurdan û PKKyî şermezar kena. Ez paştî dana şarê kurdî. Partîya Çepe ya Swêdî tim hetê kurdan de ya.''