Sîyasetmedaranê kurdan ê surgunkerdeyan derheqê vengdayîşê Rayber Apoyî, firsendê haştîye û yewîya kurdan de ajansê ma rê qisey kerd.

Hemserekê Merkezê Komelê Demokratîkî yê Kurdan (NAV) ê Berlinî Huseyîn Yilmazî vat: ‘’Seba çareserîya meseleya kurdan û haştîyêka mende gama tewr girînge azadîya Rayber Apoyî ya. Vengdayîşê Rayber Apoyî û Kongreya PKKyî seba haştîye firsendê tarîxî yê. Ganî şarê kurdî têkoşînê xo yê demokrasîyî bidomîno û yewîya neteweyîye aver bero.’’

Sîyasetmedar Abdullah Demîrbaşî vat: ‘’Vengdayîşê Ocalanî ser o feshkerdişê PKKyî gamêka tarîxî ya. Heta nika dewlete vatêne ‘heta ke çekî nêrê bêvengkerdene ma do gaman nêerzê’, nika na bahaneya ci zî werte ra wedarîyaya. Hêverî ganî tepişteyê nêweşî û sîyasîyî vera bidîyê, Meclîs de komîsyonêk bêro ronayene û seba haştîye gamî bierzîyê. Muzakereyan de muxatabo sereke Birêz Ocalan o. Seba ke o bieşko prosesî îdare bikero ganî azad bibo.’’

Tornê Şêx Seîdî û sîyasetmedar Hasan Basrî Firatî vat: ‘’Naye ra pey mesuldarîye milê dewleta tirke de ya. Ma hêvî kenê ke hukmatê AKP-MHPyî sozanê xo bîyaro ca. Waştişê ma yo zelal azadîya Ocalanî ya. Çunke o eşkeno şar îqna bikero û prosesê çareserîya sîyasîye bi lezî bikero.’’

Endamê KNKyî yê Brîtanya û Akademîsyen Mîthat Îshakî vat: ‘’Vengdayîşê Birêz Ocalanî seba yewîya kurdan firsendêko tarîxî yo. Paradîgmaya ke Birêz Ocalanî pêşnîyaz kerda seba kurdan, Kurdîstanî û dîaspora xerîtayêke pêşnîyaz kena. Yewîye her wextî ra zafêr lazim a.’’