Endama Fermandarîya Pêroyî ya YPJyî Sozdara Dêrîkî bi wesîleya serrgêra 9. ya ronîyayîşê YPJyî ANFyî rê qisey kerd.

Qiseykerdişê Sozdare Dêrîk ra beşêk wina yo: ''Serranê 2011-2012î de şaran ser o teda est bîye. Rojawan de zî tesîrê têgêrayîşê azadîye est bi. Vera kultur, ziwan, estbîyayîş û nasnameyê kurdan polîtîkaya înkar û teda est bîye. Yanî sey cinîyan seba têkoşînî sebebê ma est bîyî. Cinîyan verî YXK de dima zî YPG de ca girewt. Cinîyanê Rojawanî xora YJA-Starî ra îlham girewtêne. Cinîyanê Rojawanî vera cergan, keye de hepskerdişî têkoşîno leşkerî aver berd.

4ê nîsana 2013î de YPJyî ronîyayîşê xo îlan kerd. Cinîyan rê qirkerdiş ameyêne ferzkerdene. Ma verî taxan, şaristanan de têkoşîn kerd. YPJyî pê na hişmendî û rêxistinîye xo kerd artêşa pawitişî ya cinî û şaran. Têkoşînê YPJyî yê vera cergan zaf bale ante. Şerê YPJyî şerê xopawitişî û meşrû bi. Şorişo ke YPJyî kerdo şorişê komelî yo. YPJyî kerd ke şar qebul bikero ke cinîyî zî eşkenê şer bikerê. Pêro dinya peynî de na raştîye dîye. YPJ bi sembolê xoverdayîşî.

YPJyî bi destê xo xeyaletê DAÎŞî rijna. YPJ heta nika bîyo hêvîya pêro cinîyanê dinya. Cinîyî eşkayî mîyanê YPJyî de xo îfade bikerê. Nika ma pê şay ê ke mîyanê YPJyî de cinîyê enternasyonel, ereb, sûryanî, asûrî, armenî û tirkmenî est ê. Çunke cinîyî pê YPJyî bawer bîyî. Cinîyî têna seba şerkerdişî nê seba cuya azade zî tewrê YPJyî bîyî. 

Nika ma hêrişanê giranan de têrî yê. DAÎŞ ame çinkerdene la îşxalkerê ke wazenê DAÎŞî gandar bikerê est ê. Vera nînan têkoşînê ma do dewam bikero. Vera îşxalê Rojawanî zî têkoşînê ma dewam keno. Sey YPJyî plan, perwerde, amadekarîyê ma serê qedînayîşê îşxalî yê. Ma seba azadkerdişê şaristananê xo yê îşxalkerdeyan destê ma ra çita bêro do bikerê. Sozê ma yo esas no yo. Sey YPG û YPJyî ma serkewtiş de qerardar ê.

Rojbîyayîşê Rayber Apoyî û ronîyayîşê YPJyî heman roj a. No seba ma roja serewedaritişî, cuya newîye, hişmendîya newîye ya. Rojbîyayîşê Rayber Apoyî rojbîyayîşê ma yo. Ma do seba azadîya Rayber Apoyî bi qerardarî têkoşîn bikerê.

YPJ do şerê şarî yê şorişgêrî, rêxistinîya cinîyan, xopawitişî rê dewam bikero. Yew cinîye kamca de bena wa biba ganî xo rêxistin bikera, xo bipawa. Ma 4ê Nîsane pêro cinîyan, embazanê xo rê fîraz kenê. Hêzê ma yo tewr pîl azadî û rêxistinîya ma ya.''