Endama Dîplomasî ya TAJÊ Sûhame Şengalî ANFyî rê qisey kerd.

Sûhame Şengalî vist vîrî ke hêzê Kazimîyî 18ê nîsane ra nata hêrişê Şingalî kenê û vat: ''Şer 18ê nîsane de Dugir de dest pêkerd. Dima hêriş vilayê Tilizêrî bi. Vizêrî ra bata bi konvoyanê pîlan hêzî ameyî ke bikerê Şingalî. Asayîşê Êzidxanî, YBŞ û şar rayîr nêdanê ney. Seba ke mesele bi dîyalogan çareser biba ma xîret kerd la Iraqî şer tercîh kerd. Waştişê Îdareyê Xoserî nêameyî qebulkerdene. NÊ pêro nîşaneya şerî bîyî.''

Sûhame îfade kerd ke hêrişê vera Şingalî, Rojawan û Herêmanê Pawitişî yê Medya pabesteyê yewbînan ê û vat: ''Dêsê mabênê Rojawan û Şingalî virazîya û eleqeyê nê hêrişan bi Peymana 9ê Teşrîna Verêne est a. Şarê Şingal û Rojawanî vera DAÎŞî şer kerd. Zapî ra heta Şingalî û Rojawanî bi hemwextî hêrişî yenê kerdene. Pêvînayîşê Barzanîyî û Erdoganî de planê nê hêrişan ameyo kerdene. Dewleta tirke û PDK hêrişê gerîlayan kenê, Kazimî hêrişê Şingalî keno. Herinda ke êzidîyan rê hûrmet bêro kerdene hêrişê ci yeno kerdene. Hêzê ke nê hêrişan kenê 2014 de nêeşkayî hêrişê vera Şingalî bigêrê.

Ma do vera hêrişan xo bipawê. TAJÊ û cinîyan ê êzidîyan hişyarîye daye hukmatî ke wa hêzanê xo apey bianco. Êzidîyan qerardarîya xo eşkera kerde. Tewirê cinîyan ê êzidîyan zelal o. Seba xoserîya Şingalî û pawitişê erdê xo, ma do heta peynî xo ver bidê. Ma do erdê xo bipawê û xoserîya xo mende bikerê. No heqê ma yo meşrû yo. Serkewtişê Zap û Avaşînî serkewtişê Şingalî yo. Dewleta tirke Zap û avaşîn de derbanê giranan wena, hukmatê Kazimîyî zî do nêeşko armancê xo bîyaro ca.''